Tigummigallarneqartut ukioq ataaseq sinnerlugu tigummigallarneqartussaasut
Politiit niaquarnaveeqqutillit, aqerlumut illersuutillit sakkulisartullu Nuup aqquserngani siorna juulimi unnukkut takussaapput. Politiit suliaqarnerat nunatta oqaluttuarisaanerani eqqartuussivimmi suliani annerpaat ilagisussanngoraat paasinarsivoq.
Pasineqartut arfineq-marluk nunatsinni pinerlussimasunut inissiisarfinni assigiinngitsuni juulip 24-at, 2017-imili tigummigallarneqalerput. Suliallu inerneqarnissaa kiisami erseqqissiartorpasilerpoq. Nunatsinnut hashimik angiortumik eqqussuinermi pisooqataappat imaluunniit pinngitsuuppat?
Sermersuup Eqqartuussiviani aggustip arferngani eqqartuussutip nalunaarutigineqarnerani tamanna akissutersissavarput.
Tigummigallarneqartunit arfineq-marlunnit arfinillit Danmarkimiit nunatsinnut hashimik 63 kiilumik eqqussueqataasimasutut pasineqarput. Kingullerlu 27 kiilumik eqqusseqataasimasutut pasineqarluni.
Hashi pillugu eqqartuussivimmi suliaq politiit juulip 24-ani tigusarinnilinnginneranili aallartippoq. Grønlandsbankip nalunaaruteqarnerata politiit misissueqqissaartartui misissugassaqalersippai. Aningaaseriviup atuisumi ilaat pinerlunnikkut aningaasarsianik aningaaserivimmut inissiisoralugu pasillerpaat. Aningaaserivimmi atuisartup 90.000 koruunit nuutsippai.
Nuutsitsinera assersuutinut ilaaginnarpoq, taannalu sapaatit akunneri marlukkaarlugit 2000 koruunit missaannik isertitaqartuuvoq.
AAMMA ATUARUK Aningaasanik nuussisarnerit eqqumiitsut hashi pillugu suliamik aallarniisuupput
Annertuumik nuussinera aningaasarpassuarmut tunngasumik suliamik pissuteqarsinnaavoq. Unnerluussisussaatitaasut naapertorlugit tigummigallarneqartut arfineq-marluk nunatsinnut hashimik anngiortumik eqqussuinerminni 16 millionit koruuninik isertitsisimapput.
AAMMA ATUARUK Hashi pillugu suliami pasineqartut millionerpassuarnik iluanaaruteqarsimasut
Unnerluussisussaatitaasoq, Tobias Berg naapertorlugu politiit uppernarsaatissarsiffigisaat hashimik eqqussuinermut uppernarsaataapput. Hashi pillugu eqqartuussivimmi suliaq Grønlandsbankimi aallartinneqartoq Sermersuup Eqqartuussiviani aggustip arferngani eqqartuussinermi naammassineqassaaq. Eqqartuussivimmili suliaq unnerluussisussaatitaasut pasineqartulluunniit eqqartuussiviit qullersaannut ingerlatitseqqinngippata aatsaat tassani naammassineqavissaaq.
AAMMA ATUARUK Allakkerivimmi sulisut hashimik eqquissueqataapput
Pasineqartut arfineq-marluk tamarmiullutik unnerluussutaasunut pisuunngitsuunerarput.
