Unnerluussisussaatitaasoq: Allakkerivimmi sulisut hashimik eqquissueqataapput

Inuit arfineq marluk ikiaroornartumik hashimik anngiortumik eqqussuisimasutut unnerluutigineqartut eqqartuussaanissaat ataasinngorpat apriilip ulluisa 16-anni allartissaaq. Hash million koruuninik naleqartut eqqussuunneqarput.

Ikiaroornartup haship 63 kilotut oqimaassuseqartup annersaa, poortukkatut Københavnemit Kalaallit Nunaannut nassiunneqartarsimavoq.

Unnerluutigineqartuni marluk, TELE-POST-ip allakkeriviani sulisuupput, hash poortukkatut nassiunneqartut tigusarsimavaat, tuniniagassanngorlugillu ingerlateqqittarlugit.

AAMMA ATUARUK Hashi pillugu suliami pasineqartut millionerpassuarnik iluanaaruteqarsimasut

Tamassuma ajornartorsiutaanera TELE-POST-mit nassuerutigineqarpoq, soorluttaaq assartuinermik suliaqartuni allani aamma ajornartorsiutaanera taaneqarluni.

Arnakkuluk Jo Kleisip oqaluttuaraa, ikiaroornartumik hashimik anngiortumik eqqussuinerup pinaveersaartinneqarnissaanut, politiit ilanngaaserisullu qanimut suleqatigineqartut,

- Ajornartorsiut una inuiaqatigiinni annertuvoq, taassuma pinaveersaartinnissaa unitsinnissaalu suliassaavoq annertooq, taamaattumik suleqatigiilluta tamanna angusariaarparput, uagut suliffeqarfitsinni kisiartaalluta unitsissinnaanngilarput, politiit oqartussaasullu allat suleqatigalugit pinaveersaartinniarsarisarparput, Tele Post-imi attaveqaqatigiinnermut pisortaq Arnakkuluk Jo Kleist taama oqarpoq.

AAMMA ATUARUK Hashi allakkatigut nassiunneqartoq

Taassuma oqaluttuaraa, ikiaroornartumik hashimik anngiortumik eqqussuinerup pinngitsoortinneqarnissaanut TELE-POST-imit iliuuseqartoqartoq.

TelePostimi iliuuseqartuaannaavippugut, iliuusissat periusissallu nutaat isiginiartarpagut, soorunalimi qanoq iliortarnersugut oqaatigisinnaanngilara, tamanna sulinitsinnut pingaaruteqarmat, kisianni qanoq iliuuseqartarput, sulia una annertuvoq, annertoorujussuuvoq, sunalu tamaat angullugu pinaveersaartinniarparput TelePostimi Attaveqaqatigiinnermut pisortaq Arnakkuluk Jo Kleist taama oqarpoq.