Hashi allakkatigut nassiunneqartoq
Sermersuup Eqqartuussiviani suliaq uissuumminartoq, inuit arfineq-marluk Atlantikoq qulaallugu hashimik anngiortumik eqqussuisutut pasineqarnerannut tunngasoq ataasinngornermi apriilip 16-ianni aallartissaaq.
Unnerluussisussaatitaasut haship eqqussorneqartup ilarujussua Københavnimi sumiiffinni assigiinngitsunit nunatsinnut allakkatigut nassiussuunneqartarsimassangatikkaa, eqqartuussivimmi suliami unnerluussummi, KNR-ip pissarsiarisaani atuarneqarsinnaavoq.
Allakkatigut nassiussat Christianhavnimi Vermlandsgademi niuertarfissuarmit Menymit, Amagerimi Englandsvejimi Kvicklymit, Københavnimiillu Ideal Rensimit ilaatigut nassiunneqartarsimapput.
AAMMA ATUARUK Unnerluussisussaatitaasut arsaarinnissutiginiagarpassuaqartut
Nunatsinnut nassiussat arlaqartut hashimik imaqaqaat. Unnerluussisussaatitaasut naapertorlugit hash upernaaq 2017-imi nassiussat marluk 7,3 kiilumik 7,5 kiilumillu oqimaassuseqarput.
Nunatsinnili oqartussat nassiussisoqarnerani arlaqartuni nassiussat tigusisussamit tiguneqannginnerini unitsissinnaasimavaat. Tamanna pasineqartut arfineq-marluk tigusaannginnerannit qaammat ataaseq sioqqullugu pivoq, tassalu juuni 2017-imi.
Pasineqartunit arfineq marluusunit arfinillit hashimik 63 kiilumik nunatsinnut anngiortumik eqqussisimasutut pasineqarput ataaserlu 27 kiilumik eqqussueqataasimasutut pasineqarluni. Unnerluussut naapertorlugu hashi anngiortumik eqqunneqartoq nunatsinni tuniniarneqarneratigut 16 millionit koruunit iluanaarutigineqarput.
Pasineqartunit arfinillit angutaapput ataaserlu arnaalluni, taakku tamarmik unnerluussutigineqartunut pisuunnginnerarput.
AAMMA ATUARUK Hashi pillugu suliami pasineqartut millionerpassuarnik iluanaaruteqarsimasut
