Thomas Møller Olsenip suliareqqitassanngortitsinera Reykjavikkimi aallartittoq
Nunatsinneersup Thomas Møller Olsenip arnamik Islandimiumik Birna Brjánsdóttirimik Reykjavikkimi toqutsisimasutut hashimillu 23 kiilumik anngiortumik eqqussisimasutut pisuutinneqarluni ukiuni 19-ini parnaarussassanngortinneqarneranit qaammatit 13-it qaangiupput.
Suleriareqqitassanngortitsineralu Islandip eqqartuussisuuneqarfiani ullumi ataasinngornermi aallartinneqarpoq, Thomas Møller Olsenillu pillaatissami sakkukillineqarnissaa piumasaraa, Islandimi tusagassiorfik RÚV taama allaaserisaqarpoq. Eqqartuussivilersuunneqarnermini toqutsinermut pinngitsuunerartuarpoq hashimilli anngiortumik eqqussisimanini nassuerutigaa.
AAMMA ATUARUK Thomas Møller Olsenimut eqqartuussut oktobarimi aalajangiiffigineqassasoq
Thomas Møller Olsenip suleqatigisimasami Islandimiumik arnamik toqutsisuunera suliareqqitassanngortitsinermini eqqartuussivimmut paasitinniarsarissagaa, RÚV allappoq.
Suleqatigisimasaa, aamma nunatsinneersoq, Thomas Møller Olsen peqatigalugu januaarimi tigusarineqarpoq. Sapaatilli akunneri marluk qaangiummata taanna iperagaavoq, qaammallu ataaseq qaangiummat pasisaajunnaarpoq Islandimilu politiit pasilliutitik taamaatiinnarpaat.
Suliareqqitassanngortitsinermut aallarniutaasumik tusarniaasoqarmat Thomas Møller Olsenip suleqatigisimasaata toqutsisuunissaa Islandimi unnerluussisup Sigríður Friðjónsdóttirip eqqortuunnginnerarpaa, RÚV taama allappoq.
Thomas Møller Olsen ataasinngornermi eqqartuussisoqarnerani nassuiaateqqinneqarpoq, aammattaaq ilisimannittut marluk aggersarneqarput taakkulu oqarasuaatikkut nassuiaatinneqassapput.
AAMMA ATUARUK Unnerluutigisap inuttaq alla tikkuaraa
AAMMA ATUARUK Iperagaasimasoq persuttaanerup nalaani biiliniissimasinnaanngilaq
Birna Brjánsdóttirip toqutaaneranik suliaq Islandimi immikkuullarissuuvoq. Toqutsisoqartarnerami, pingaartumillu toqutaasup toqutsisullu imminnut ilisarisimanngittarnerat, Islandimi qaqutigoortupilussuuvoq. Pisoq Islandimi innuttaasunut aalassatsitsisupilussuuvoq, arnammi inuusuttup periarfeerunneqarnerani ujaasineq annertooq innuttaasunit peqataaffigineqarluarpoq.
AAMMA ATUARUK Birna-sagen har været usædvanlig på flere måder
Ukiunik 19-inik parnaarussassanngortitsisoqarnera aamma nalinginnaasumit sakkortuneruvoq, Reykjavikkimi eqqartuussivimmi unnerluussisup siorna ukiakkut eqqartuussisoqarnerata kingorna KNR-imut oqaatigaa.
