Birna pillugu suliaq: Thomas Møller Olsen Danmarkimi parnaarussivimmut nuutsinneqartoq
Angut kalaaleq, Thomas Møller Olsen Islandimi parnaarussivimmit Danmarkimi parnaarussivimmut nuutsinneqarpoq.
Islandimiut nutaarsiassaqartitsiviat, RÚV taama allaappoq.
Thomas Møller Olsen islandimiumik arnamik, Birna Brjánsdóttirimik januaarimi 2017-imi toqutsisimasutut hashimillu eqqussueriaraluartutut septembarimi 2017-imi ukiuni 19-ini eqqartuussaalluni parnaarussassanngortinneqarpoq.
Thomas Møller Olsenip illersuisuata, Björgvin Jónssonip oqarnera naapertorlugu pineqaatissinneqarsimasup nammineerluni pineqaatissiissutimi sinnera Danmarkimiilluni pillaatigerusussimavaa.
Maanna Vestre Fængselimiittoq
Thomas Møller Olsen maanna Københavnimi Vestre Fængselimiittoq illersuisuat RÚV-imut oqarpoq.
Islandimiut nutaarsiassaqartitsivii naapertorlugit danskit oqartussaasuisa suliamut tunngatillugu paasissutissat peqqissaaruteqqissaarlugit nutserneqarnissaat piumasarimmassuk Thomas Møller Olsenip Danmarkimut nuutsinneqarnissaanut suliaq piffissami sivisuumi suliarineqarpoq.
AAMMA ATUARUK Eqqartuussut aalajangersarneqartoq
Danmarkillu nuutsitsinissaq oktobarimi aatsaat akuersissutigaa, Thomas Møller Olsenilu ullualuit kingorna Danmarkimut nuutsinneqarluni.
Thomas Møller Olsen Birna Brjánsdóttirimik toqutsisimasutut januaarimi 2017-imi tigusarineqaramili Islandimi parnaarussivimmiilerpoq.
Pisuunnginnerartoq
Thomas Møller Olsenip septembarimi 2017-imi oqaluttuarisaanermi sakkortuumik eqqartuussisoqareernerani eqqartuussivimmi suliaq Islandimi eqqartuussisuuneqarfimmut suliassanngortippaa, eqqartuussulli eqqartuussisuuneqarfimmit novembarimi siorna atuuttussanngortinneqarpoq.
Thomas Møller Olsen eqqartuussivimmi suliap ingerlanera tamaat pisuunnginnerarpoq.
AAMMA ATUARUK Toqutsineq Island tamakkerlugu aalassatsitsisoq
Islandimiup arnap inuusuttup tammarneranit suliap toqutsisoqarsimaneranik sulianngornera Islandimi nunanilu allani eqqartugaangaatsiarpoq.
Islandimiorpassuit arnap ujaarineqarneranut, Islandimi ujaasinermi annerpaatut taaneqartumi, peqataapput. Toqutsisoqarneralu islandimi nalinginnaanngilaq, Islandimimi pinerluuteqartoq toqutaasorlu imminut ilisarisimasariinnatik toqutsisoqartarnera qaqutigoortorujussuuvoq.
