Thailandimiut SIK-mut ilaasortanngorput
Inatsisartut ilaasortaq Siverth K. Heilmann Atassummeersoq Thailandimiut neriniartarfinni nalunaaquttap akunnerpassuini sulisarnerat pillugu uissanngusunut ilaavoq.
- Sineriammi illoqarfinni arlalinni tamanna takussaavoq. Sulisartut Asiameersuunerusut ullormut nalunaaquttap akunnerpassuini sulisut takussaasarput. Eqqarsaatiginngitsuugassaaneq ajorpoq sulerulunnerminni naammaginartunik akissaateqartinneqarnersut, Siverth K. Heilmann KNR-imut oqarpoq.
Thailandimiut suliuartut nunani tamalaani takussaapput ilaatigullu pasillerneqartarlutik nunaqavissut suliffissaraluinik ingiaasutut.
Thailandimiut 20-it missaanniittut maanna sulinermi inuussutissarsiutillit kattuffianni SIK-mi ilaasortanngorput. Taamaasilluni akissaatitigut atugaat paasisaqarfigineqarput.
- Akissarsiatigut atugaat ajoriinnagassaanngillat naak tamanna arlalinnit aarleqqutigineqaraluartoq, SIKp siulittaasuat Jess G. Berthelsen KNRimut oqarpoq.
Taamaattoq ippinnartumik maluginiagaqarpoq.
- Takornartaanngilaq ullormut nalunaaquttap akunnerini qulini sapaatip akunneranut ullut arfineq marluk sulisarnerat. Isumaqarpunga tamanna isumakulunnartoqartoq, Jess G. Berthelsen oqarpoq.
Nunaqavissut Thailandimiunut unammillerniarnerat ajornakusoorsinnaavoq SIK akissarsiarititai tunngavigalugit inuuniartunut.
- Ilaqutariit Nuummuut nuuinnarsinnaanngillat aappariit aappaannaa suliffissaqarpat. Nunaqavissut inissarsinissamut ukiut qulit angullugit utaqqisariaqartarput. Taamaammat tamanna sulilernissamut aporfiusinnaasarpoq, Jess G. Berthelsen oqarpoq.
Maanna Thailandimiut 20-it missaannaat SIK-mi ilaasortanngorput. Taamaammat suli tamakkiivissumik ilisimaneqanngilaq atorfeqarnermi qanoq atugassaqarnersut aamma inissaqarniarnikkut qanoq atugassaqartitaanersut.
- Minnerpaatut piumasarisariaqarparput SIKp isumaqatigiissutai malillugit akissaasersorneqassasut, Siverth K. Heilmann oqarpoq.
- Kisianni asiamiut suliartortut atugaat pillugit nunatsinni matoqqasoqartorujussuuvoq. Paasissutissat erseqqissut qaqilerneqartuuppata tunngavilersorluakkamik oqallisiginissaannut tunngavissaqarnerulissagaluarpugut, Siverth K. Heilmann oqarpoq.
- Inatsisartut ukiaanerani katersorneranni ammaalluni oqallinnermi paasissutissanik aalisaraluarpunga. Kisianni ajoraluarlutumik Naalakkersuisunit tamanna qisuariarfigineqanngilaq, Siverth K. Heilmann oqarpoq.
