Terianniat perlerortut tallimat nassaarineqartut

Ukiut arfineq-marluk sinnerlugit perlerortoqanngereerluni nassaartoqarpoq. Terianniat toqunneqarput malittarisassallu tamarmik malinneqarlutik.

Allattoq Kim Hinrichsen

septembarip 05-at 2024 11:51

Nutserisoq Connie Fontain

Ilulissanit, Paamiunit, Camp Kangiusamit, aamma Nuuk Kangerluani Qooqqunit terianniat tallimat perlerortut paasineqarpoq.

Terianniat toqunneqareerput. Terianniat perlerortutut pasitsaanneqarlutik ukioq manna marsip juulillu akornanni toqunneqarsimapput.

Aamma atuarukTeriannissat perlerortut Nuup eqqaani takuneqartut

Aalisarnermut Piniarnermullu Naalakkersuisoqarfik tusagassiuutinut nalunaarummi allappoq.

Teriannianik perlerortunik uppernarsaasoqarnera qangalinngorpoq. Ilulissani kingullermik 2017-imi aamma Paamiuni Nuummilu 2010-mi uppernarsaasoqarpoq-

Pissusissaanngitsumik iliortut

Terianniat nalinginnaasumik nujuartaapput.

Pissusaannilu allanngorneq una terianniat tallimat pasitsaanneqarlutik misissugassanngortinneqarneranni paasineqarput.

Oqartussanit innersuussutit

Tunillaanissamut pinaveersaartitsineq anguniarlugu maleruagassat makku malinneqarnissaat UNIO-mit innersuussutigineqarput:

Uumasut pissusissarinngisaminnik pissusinissimasut qanillinaveersaakkit.
Teriannissat napparsimarpasippata napparsimarpasinngikkaluarpataluunniit qanillinaveersaakkit.
Inuk kiitissimappat ikeq piaarnerpaamik imermik qaqorsaammillu salinneqassaaq piaarnerpaamillu peqqinnissaqarfik attavigineqarluni.
Ingerlariaqqinnissaq pillugu siunnersorneqarnissamut Uumasunut Nakorsaqarnermut Inuussutissalerinermullu Oqartussat piaarnerpaamik attavigineqassapput.
Akiuussuserneqarneq perlerornissamut illersuilluartarpoq, inatsisitigullu piumasaqaataavoq qimmit qitsuillu perlerornermut akiuussutissamik kapitinneqarsimassasut.
Nerisassaasinnaasut teriannissanut ingalassimaartikkit. Nerisassat eqqakkat teriannissanit tikinneqarsinnaagaangamik teriannissat inoqarfinnut qanillattulertarput.

Allisiguk

Taakkumi ilisimasallit inunnut uumasunullu qaninngoortorujussuusutut aamma qaasunneratut taasaat pissusissarinngisaannik iliuuseqarnerupput.

Taamaammat uumasut inuillu teriannianut qanillisimasut pillugit malittarisassat arlallit erngertumik aallartinneqarput. Ilaatigut akiuussutissiisoqarluni.

Qisermi tuniluuttartoq

Perlerorneq virusiuvoq taannalu uumasunit tunillatsissimasunit uumasunut allanut inunnullu tuniluussinnaavoq. Nunatsinni issittup terianniaani perlerornermik nassaartoqakkajunnerusarpoq, uumasulli allat aamma tunillatsissinnaallutik.

Uumasoq perlerornermik tunillatsissimasoq qisimigut viruseqalertarpoq, tamannalu assersuutigalugu kiisinikkut imaluunniit ikikkut tunillaassinnaalluni.

Aamma atuarukKangerlussuarmi teriannissanik perlerortoqarnera ernumatitsivoq

Uumasoq tunillatsissimasoq sapaatit akunnerini arlalinni perlerornermik takussutissaqanngikkaluarluni tunillaassuisinnaasarpoq.

Teriannianik uumasunilluunniit allanik nalinginnaanngitsumik pissusilersortunik naammattuuiguit imaluunniit nunami teriannianik toqunikunik nassaassaguit Uumasunut Nakorsaqarfik Inuussutissalerinermullu Oqartussaaffik uunga attavigiuk uumasut@nanoq.gl imaluunniit 34 50 00 oqarasuaatit ulluinnarni nal. 9.00-imit 15.00-mut ammanerisa nalaani.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.