Teriannissat perlerortut Nuup eqqaani takuneqartut
![](/sites/default/files/styles/image_934x467/public/article_images/arctic_fox_white_colour_morph_june_2000.jpg?itok=b6St-JT3)
Teriannissat perlerornerannik pasineqartut Nuup Kangerluani inunnut qanittuni takuneqarsimasut Uumasunut Nakorsaqarfik Inuussutissalerinermullu Oqartussaqarfik tallimanngormat ualikkut tusagassiorfinnut nalunaarummi allapput.
Nuummut qanittumi teriannissat pissusissarinngisaminnik pissusilersornerat oqartussaasut kalerrisaarinerannut pissutaavoq.
- Kalaallit Nunaanni teriannissat perlerukkajuttarput, taamaammat terianniamik naammattoorsiguit tunillanneqarsimanera naatsorsuutigissavat, allapput.
Teriannissat nalinginnaasumik ersiorneq ajorput, qiningasarput, nuakoorlutik kiisalu uumasut inuillu saassussinnaallugit. Pinngortitamiikkuit uumasumit qanillattorneqannginnissat taamaammat pingaaruteqartoq, oqartussaasut aarlerisaaripput.
Qanillattortinnaveersaarniarlugit tammaarsimaarfissianni illit sumiiffigisannit nerisassat ilaatigut allamiitinneqarsinnaapput.
Toqussutaasinnaasut
Teriannissamit kiitikkuit ingerlaannaq nakorsiassaatit. Tamatumunnga perlerornerup katsorsarneqanngikkuni toqussutaasinnaanera pissutaavoq.
Oqartussaasunit ilutigitillugu annertuumik innersuussutigineqarpoq uumasuutit nappaammut akiuussuserneqarsimanissaat. Kiineqassappata eqqortumik ikiorneqarnissaq siunertaralugu Uumasunut Nakorsaqarfik Inuussutissalerinermullu Oqartussaqarfik erngertumik attavigineqassasut, allapput.