Jonna Olsen: Meeqqat terianniamik takusimallutik uagutsinnut ilaannikkut qimaasarput

- Akulikittarput. Sualummik maani sissami najugaqarluni. Eqqatsinniittarput taavalu ukiukkut ilaanni matutta eqqaarannguani siseqartarput.
Maniitsumeersoq, Jonna Olsen oqarpoq. Taassuma Maniitsumi terianniat ernumassutigai. Terianniat qaasullutillu inunnut saassussiniarlutik malersuiniartartut taassuma oqaatigaa.
- Ernumanartarpoq. Sualummik eqqatsinni meeraqartuaannarami. Ilaannikkut qimaallutik isertarput terianniamik takusimallutik. Taava isertikkallartarpagut anequnngikkallarlugit. Aneerusukkaluarlutik aneersinnaaneq ajorput terianniaqartillugu.

Inuit sisamat teriannianik perlerortunik aallaannissinnaasariaqartut
Nunatsinni teriannianik perlerortoqartarnera imaluunniit perlerorsorineqartunik terianniaqartarnera qaqutigoortuunngilaq.
Terianniat nalinginnaasumik nujuartuupput, kisianni perlerulersimagaangamik – qimmitut perlerortut assigisarpaat – qaasuttunngortartut inunnullu qaninniartarlutik. Nuakoortarput saassusseriarsinnaallutillu.
Oqartussat assersuutigalugu Kalaallit Nunaanni Uumasunut Nakorsaqarfik Inuussutissalerinermullu oqartussaqarfiup inuit teriannianut qaasuttumik qaninniartumillu pissusilersuuteqartunut ungasillisimaarnissaannik kaammattuuteqarfiginikuuaat. Uumasulli illoqarfimmi takussaaleraangata tamanna ajornakusoorsinnaasarpoq. Taamaammat Maniitsumi innuttaasut toqqissisimanngitsut assinik videolianillu inoqatinut attaveqaatikkut siammarteripput, taakkulu namminneq – imaluunniit meerartatik – kiitinnissaat ernumassutigaat.
Qeqqata Kommuniata Maniitsumi teknikkikkut immikkoortortaqarfiata teriannianut pullatilersuisimallutik, sulisorlu ataaseq illoqarfimmi teriannianik aallaannissinnaatitaasoq oqaatigaat. Immikkoortortaqarfiup sulisut katillugit sisamat uumasunik napparsimasunik illoqarfimmi aallaannissinnaatitaalernissaat politiinut qinnutigaat.
Kiitinnermi tunillatsittoqarsinnaasoq
Jonna Olsenili suli ernumavoq.
- Ippassaq tusarparput Ivissuaateralaani meeqqat pinnguartut malersorneqarsimasut. Terianniarlu nuakoorluni, taanna oqarpoq.
- Taava qujanartumik malersortileraluartut taakkua bilinik naammattoorneqarlutik. Bilit terianniakasik aportariaqarlugu toqussimavaat.

Perlerorneq virusimit nappaataavoq uumasunit napparsimasunit uumasunut allanut inunnullu tuniluussinnaasoq. Kalaallit Nunaanni pingaartumik issittup terianniaani perlerorneq takuneqakkajuttarpoq, taamaattorli uumasut allat aamma tunillatsissinnaallutik.
Uumasoq perlerulersimaguni qisimigut viruseqalersarpoq, taannalu assersuutigalugu kiisinermigut tunillaasinnaalluni imaluunniit ikikkoorlugu tunillaassuussinnaasarluni.
Uumasumik perlerortutut pasitsaanneqartumit kiitissimagaanni ikeq imermik qaqorsaasikkamik erngertumik salinneqassaaq.
Tamatumalu kingorna nakorsaaserneqarnissaq pillugu napparsimmavimmut saaffiginnittoqarluni, perlerornermi nakorsaaserneqanngikkuni toqqutigineqarsinnaammat.
Uumasuutillik uumasuutitik perlerornermut akiuussusertissagaat oqartussat aamma kaammattuutigaat. Kiitissimappatalu eqqortumik ikiorneqarnissaq anguniarlugu Uumasunut Nakorsaqarnermut Inuussutissalerinermullu Oqartussat piaarnerpaamik attavigineqassapput.
