Ilulissani uumasut nakorsaat: Terianniat qanillinagit - perlerorsinnaapput
Ilulissani terianniamik takussaguit - qanillissanngilat. Perlerornissaa ilimanarluinnarpoq.
Uumasut nakorsaat, Sanne Wenneberg taama oqarpoq.
- Terianniamik takunnikkuit qanillissanngilat. Terianniat amerlanerpaartaat perlerorsoraagut, uumasut nakorsaat KNR-imut oqarpoq.
Terianniat perlerornerat nalinginnaanngitsuunngilaq. Amerlasuullu taama napparsimasarnerat aamma nalinginnaanngitsuunngilaq. Sanne Wennerbergip taakkunannga qanillisoqarnissaanik mianersoqqussuteqarnera inuit immikkut mianersornissaannut tunngaannarpoq.
- Mianersornissamut tunngavik aallaavigalugu mianersoqqusivugut. Qanoq annertutigisumik perlerortoqarnersoq pillugu ilisimasagut annikipput, ilisimasagulli tunngavigalugit amerlanerpaat perlerornissaat qularutiginngilarput, uumasut nakorsaat oqarpoq.
Nuakoorlutillu saassussisartut
Perlerorneq asuliinnaanngilaq. Virusiuvoq, sianiutinut qaratsamullu saassussisartoq. Taamaammat terianniat pissusaat allanngungaatsiartarpoq. Tassanngaannartumik inunnut ersiunnaartarput:
- Inunnut qanillisarput, pissusilersuutaallu ingasannerulertarlutik. Tassa saassussisalertarput. Nuakoorsinnaapput. Salullutillu meqquluttarput. Amerlanertigulli uatsinnut qanillisut - saassusseriataartullu takusarpagut, Sanne Wennerberg oqarpoq.
- Terianniamik Kangerlussuarmi biilinik malersuilluni assakaasuinut kimmaaniartumik siorna nalunaaruteqartoqarpoq. Pissutsimikkut paatsiveerutiivittarput.
Video Victoria Lynge Jeremiassenimit immiunneqarpoq. Tassuma terianniaq Ilulissat mittarfiullu akornanni naapippaa. Sanne Wennerbergip video isiginnaaramiuk perlerortutut nalilerpaa. “Perlerortoqarneranik naliliinermi nujuannginnerat ersiutit pingaarnerpaartaraat. Tamanna tunngavigalugu terianniaq perlerorsimassasoq ilimagaara”, taanna KNR-imut oqarpoq.
Terianniamik kiitikkaanni ingerlaannartumik napparsimmaviliartoqassaaq. Inuit aamma perlerulersinnaapput, Sanne Wennerberg oqarpoq
AAMMA ATUARUK Qimmit angalaannartut perlerornermik tunillatsissinnaanerat Kommune Kujalliup mianersoqqussutigigaa
- Immannguaannaq napparsimasoqarneq ajorpoq - napparsimarujussualertaramik tamanna toqqutigineqarsinnaavoq, uumasut nakorsaat oqarpoq.
- Aamma annikitsuinnarmik kimillalluni kiitikkaluaraanniluunniit - napparsimmaviliartoqassaaq.
Ujaqqamik milorneqassasoq
Qimmit qimuttut perlerornermut akiuussutissamik kapitinnikuupput. Taamaakkaluartorli kiitikkunik uumasut nakorsaanukaanneqassasut, uumasut nakorsaata, Sanne Wennerbergip oqaatigaa - akiuussutissarmi tamatigut iluatseqqissaarneq ajorpoq.
Terianniamik perlerorunartumik takugaanni qanoq iliortoqassava?
- Qimaannarneqassaaq. Terianneq qanillivallaarpat illuartoqassaaq. Qanillivippallu ujaqqamik milorneqarluni. Taama politiit kommuniluunniit attavigineqassapput, uumasut nakorsaat oqarpoq.
