TELE POSTip siulittaasortaava: Siulittaasuuneq unammillernartuussasoq naatsorsuutigaara
Taanna ilaatigut BankNordik Groupimi siulersuisunut ilaasortaavoq taamatullu Danmarkip EU-mi ilaasortaanissaanut suliniaqatigiffiup, Europabevægelsenip siulersuisuini ilaasortaalluni.
Nunatsinni uuliasiornermi ingerlatseqatigiiffimmi, NunaOilimi siulittaasutut, Stine Bosse aprilimi qinigaavoq.
- TDC-p siulersuisuunerini marloriarlunga ilaasortaasarpunga maannalu aamma tassani ilaasortanngoqqinnikuullunga. Taamaattumik attaveqaatit pillugit ilisimasakka pitsaalluinnartuupput.
TELE-POSTip siulersuisuini nutaarluinnarni siulittaasunngortoq, Stine Bosse oqarpoq.
Taanna Danmarkimi suliffeqarfissuarni misilittagaqarluaraluarluni, taamaattoq Nunatsinni sullissilernissani unammillernartussaassasoq, KNR-imut oqaatigaa.
Nunatsinnili suliffeqarfimmi allami, tassa NunaOilimi siulittaasutut aperilimi qinigaavoq, taamaattumillu misilittagaqalereersimasutut oqaatigineqarsinnaalluni, taamaattorli TELE-POSTimi siulittaasunngornini unamminartussaassasoq oqaatigalugu.
- Kalaallit Nunaata Danmarkimut naleqqiullugu angissusaa eqqarsaatigalugu tamassuma paasilluarnissaa pingaaruteqarpoq sungiunniagassaallunilu. Tamannalu sungiunniagassaraara. Tamannalumi sungiukkukku Danmarkimi ilisimaligassakka Kalaallit Nunaanni atorluarsinnaavakka.
TELE-POSTip namminersortunngorsarneqarnissaa pillugu, Stine Bosse maanna oqaaseqarusunngilaq oqarluni tamanna politikkikkut aalajangiunneqartussaammat maanna tamanna isummerfiginiarnagu.
TELE-POSTimut unammillernartussaq tulleq tassaavoq, ukiup tulliani aningaasaqarniarnerup ilorraap tungaanut saatinneqarnissaa pillugu aningaasanik atorniarnissaq. Tamanna allallu unamminarsinnaasut pillugit, Stine Bosse oqarpoq imalu nangilluni.
- Aningaasanik atorniarsinnaagaanni takutinneqartariaqarpoq aningaasanik iluanaarsinnaaneq. Tamannalu iluatsissappat oqimaaqatigiissaarineq pitsaasoq nassaarineqartariaqarluni, ingammik eqqarsaatigigaanni Kalaallit Nunaanni aningaasarsiorneq eqqarsaatigalugu tamanna tamanut attuumassuummat nunallu allat aningaasarsiortarnerannut nallersuunneqarsinnaanani.
TELE-POSTimi siulittaasunngortoq, Stine Bosse oqarpoq.
TELE-POSTip pingasunngormat ataatsimeersuarnerani siulersuisuni ilaasortaalersut allat ukkuupput. Taassuma siulersuisuni suleqatissai allat tassaapput, Arctic Winter Games 2016-ip pisortaa, Maliina Abelsen, Danmarkimi attaveqaatit pillugit suliffeqarfissuarmi, TDC-mi teknologi pillugu pisortaq, Kim Søgård Kristensen aamma eqqartuussisuserisoq, Ulrik Blidorf.
