TELE POSTip internettikkut aaqqiissutissat upernaaru saqqummiutissagai
Taarsiullugu TELE-POST-ip naatsorsuutigaa upernaamut Nunatta avannaani tunumilu internetikkut attavilersuinissamut siunnersuusiussalluni.
Illersornissamut ministereqarfiup nalunaarutigisimagaluarpaa Issittumi nakkutilliineq Issittormiunut iluaqusiissasoq; Tele Postip pisortaanera Kristian Davidsen malillugu Illersornissaqarfiup aappaagu aningaasaliinissaanut peqataanatik.
Taarsiullugu Tele-Post makku suleqatigalugit aaqqiissutissamik allamik ujartuivoq: Illersornissaqarfik, Siemens Islandimiittoq , Savalimmiuni Tele aamma DTU Space. Taakku aappaagu aprilip aallaqqaataa nallertinnagu saqqummiussassamik suleqatigiissuteqartut Kristian Davidsen oqarpoq.
AAMMA ATUARUK Immap naqqatigut attaviliiniarneq akisugaluartoq iluaqutaasussaavoq
- Neriuutigisarput tassaavoq pisisinnaassutsip kattunneqarnissaa - tassa Tele Postip akilertagai aamma Illersornissaqarfiup akilertagai kattullugit aaqqiivigisinnaajumallugit, Kalaallit Nunaanni atuisunut pitsanngorsaatitut aammali Illersornissaqarfiup pisariaqartitaanut iluaqutissatut.
Maani innuttaasut 4000-it missingi internetimut suli attaveqanngillat.
Ingammik innuttaasut Upernaviup avannaaniittut Tunumniittullu, tamaangami immap naqqatigut kabeli radiokædelluunniit anngussinnaanngillat.
Taamaattumik nukiit aningaasallu kattutaartariaqarput, Namminersorlutik Oqartussat IT-mut pilersaarutigaat innuttaasut tamarmik 2018-ip naanerani attavilerneqarsimanissaat.
Taama anguniagaqarneq piviusorsiungajattoq Kristian Davidsen naliliivoq:
- Isumaqarpunga 2018-imi kikkut tamarmik nettimut attaveqalersinnaanerat piviusorsiortoq. Tamangajammik ullumikkut attaveqarsinnaapput, oqarsinnaavugut ilaat pitsaanngittorujussuarnik attaveqartut. Piviusorsiorpoq anguniakkat ilarpassuisa anguneqarsinnaanerat, tamarmiunngitsorli, pisortaq oqarpoq.
AAMMA ATUARUK Imaatigut kabelip tallinissaa qanilliallattoq
Illersornissamut qullersaqarfik naapertorlugu, Illersornissamut qullersaqarfiup qaammataasat atorlugit nakkutilliinissaa EU-mi suliariumannittussarsiuussinikkut suliariumannittussarsiuunneqassaaq. Illersornissamut ministereqarfiup Issittoq pillugu misissueqqissaarinera politikkikkut isumaqatigiissutigineqareerpat tamanna pissaaq.
Tamatumalu pinissaata tungaanut paasissutissat Illersornissaqarfiup EU-p qaammataasaanit Copernicusimik taaguuteqartunit pissarsiarisassavai, Illersornissamut ministereqarfik KNR-imut mailikkut taama ilisimatitsivoq.
