Teknologii nutaap Piitap inuunera annaappaa, napparsimasut isumannaatsuunissaannut allannguerujussuarsinnaavoq
Peter Hammond ukiakkut aqqusernit quasattoq aqqusinisikkut pisulluni orlunermini niaqquni annersippaa.
Orlunera sakkortusimasoq kingorna takussutissaqarpoq, tassa qaratsamigut aanaartoornermik kinguneqarpoq, tarrasortereernermi kingorna erngertumik suliaritittussanngorpoq.
Naliginnaasumik Peter Hammond Danmarkimut suliaritikkiartorluni aallarunneqartussaagaluarpoq. Taamaaliortoqanngilarli, peqqinnissaqarfiummi misileraatitut isarussat teknologi nutaaliap atornerata Danmarkimut angalaqqaartariaqarneq pinngitsoortippaa.
Nunatsinni qaratsamik pilattaasartoqanngikkaluartoq, Peter Hammond nutaatut nunatsinni suliaritippoq.
Peter Hammond angerlarsimaffianut pulaaratta, angalaqqaarani suliaritissimanini unnersiutigaa.
-Assut iterama iluaallappunngunga tamaani suliarisimammannga iluaallannaqaaq assorsuaq , Peter Hammond unnersiorpoq.
Sumiifimmi pilattaasoq immikkut ilisimasallit assaaniilerput
Isarussat teknologiitallit isarussatut isikkoqarput. Digitaaliuppulli assiliiveqarlutillu. Skærmikkut isarussanik atortoq isigisaanut allat malinnaasinnaapput.
Nakorsaq qaratsamik pilaasartoq Danmarkimiittup nunatsinni pilaattaasup pilattaanera malinnaaffigisinnaavaa.
Jeppe Lohfert Haslund-Vinding oqaasii naapertorlugit kalaallit pilattaasartut sivikitsumik ilitsersorneqarlutik ingerlanneqareerunik. qaratsat sianiutillu immikkoortortaqarfiani suliniut teknologi isumannaatsuunerarpaa. Piumasaqaataavorli nunatsinni pilaasartut issat qanoq atornissaaannik pikkorissarnissaat.
- Teknologi taanna atorlugu pilattaasartup sulineranut isiginnaaqataasarpunga, soorlu tunuani nikorfasuuguma ilitsersuillunga. Teknologi malussarittuuvoq atlantillu illuaniit atoruminarluni, taanna oqarpoq.
Ukiut tamaasa inuit qulit nunatsinni niaqqumikkut annernerata kingunerisaanik aanaartoortarput. Amerlanerit Rigshospitalimi suliaritittarput.
Najannguaq Jørgenseni, Peter Hammondip suliarinnittua Rigshospitalip sulisuinut aviisi ”Indenrigs”-mi pilaanermini toqqissisimasimalluni unnersiutigaa.
- Qaqutikkut napparsimasut taamaattut naammattortarpagut. Taamaattumik isarussat atorlugit qarasanik pilattaanermik misilittagaqarluartumik malinnaavigineqarsinnaalluni ilitsersorneqarsinnaallunilu toqqissisimanarpoq. Qaratsamik pilattaasartoq ilitsersuisarpoq, pilaanermilu nalaani apeqqutissaqaraanni akisinnaalluni, inderigsmut oqaluttuarpoq.
Inuit isumaqartarsimapput aalakoortunga
Peter naapikkaanni akornuserujussuaqqammernera takorlooruminaappoq. Piviusuulerpormi piffissami qaammat decemberimiit majimut qaratsamigut naqitsineqarpallaalerluni aanaartooreerluni, inuk allarujussuanngorpoq.
- Tassa oqaluttuuppaanga tigummiinnaavittarsimallunga silamiikkaangatatta, taavalu iperalaaraanga sumut tamaanga aallaralartarsimagama, kanngusuttarsimavoq inuit aalakoorsorisarmannga. Kisiannimi ajorsimaqaanga taamanikkut - ilaa aappara isumaqalersimagaluarpoq puujuttunngulertunga taavalu ernutaqqiutinnguarput aamma tunulluisimasalersimallugu taamaanneq ajuuillunga, Peter Hammond taama oqarpoq.
Siunissaq qaamasumut ingerlavugut. Maanna avaarnerup kingorna inuuneq sungiusimasaq uterfigineqarsinnaalerpoq.
-Tassa ajorisassaanngilaq ajunngilaq, maannakku aamma nukittoriartorpunga aamma pisunnera sukkatsikkiartorpoq. Ilaa misilingartuartarakku anersaartupilullunga. Misilingartuarlugu tiguniaataralugu pisuttarnera, Peter Hammond, taama oqarpoq.
