TB-qartut Tunumi amerliartorput
Kuummiuni innuttaasut tamarmik 43 procentii tuberkulosep bakteeriaanik tunillatsissimasut misissuinerup inernerisa takutippaat.
Tunillatsissinnaaneq tassaanngilaq sakialluummik nappaateqalersimaneq sakiallulersimasullu ilaannaat allanik tunillaasinnaasuusarput. Inersimasut tunillatsissimasut inuunerminni nappaateqalersinnaanerat annikitsuarannguuvoq, kisiannili meeqqat inuusuttullu nappaateqalersinnaanerat annerulluni. Inuusuttut sisamassaat tallimassaalluunniit tuberkulosep bakteeriaanik pigisalik napparsimalernissaminut ulorianartorsiorsinnaavoq.
Tasiilap Napparsimmaviata maannakkorpiaq tuberkulosemik tunillatsissimasut tamaasa aggersarlugit oqaloqatigalugillu annertuumik sulineq aallartippaa. Tunillatsissimasut akornanni qassit napparsimalersimanersut ilisimaneqanngikkallarpoq. Kikkut nappaateqarnertik pissutigalugu nakorsarneqarnissaat kikkullu nappatsaaliniagassaasut kingorna aalajangiivigineqassaaq.
1990-ip kingornagut tuberkuloseqartut amerliartorsimapput. Ukiuni kingullerni tallimani ukiumut agguaqatigiissillugu 73-it nalunaarutigineqartarput. Nunatsinni inuttussutsimut naleqqiullugu Kalaallit Nunaat Afrikami Asiamilu nunanut arlalinnut nallersuunneqarsinnaavoq.
Nunatsinni Nakorsaaneqarfiup innuttaasunut tuberkulosemut ersiutit maluginiarnissaasa eqqumaffiginissaat aammattaaq kajumissaarutigaa. Piffissami sivisuumi - tassalu imaappoq qaammatip ataatsip ingerlanerani quersoraanni imaluunniit ilaquttat qaniginerpaasat ilaat piffissami sivisuumi quersorsimappat tuberkulosemut misissortinnissamut peqqinnissaqarfik attavigineqartariaqarpoq.
