KNAPK naalakkersuisoqarfiup isornartorsiorneqarneranut isumaqataavoq - Tatiginninnerput tassunga killeqarpoq!

Aalisarnermut Piniarnermullu naalakkersuisoqarfik inatsimmik uniuilluni kukkuluttoqqimmat, KNAPK-p killissaa nallerpoq.

Allattoq Karline Platou

marsip 28-at 2023 16:06

Ukiut marluk ingerlaneranni ombudsmandi Aalisarnermut Piniarnermullu naalakkersuisoqarfimmut ipissumik isornartorsiuivoq naalakkersuisoqarfik inatsimmik tunngavissaqarani aalajangiisimanerarlugu.

Maannali naammaleqaaq.

Aalisarnermut Piniarnermullu naalakkersuisoqarfiup akisussaaffini naammattumik paarinngikkaa KNAPK-mi siulittaasoq Nikkulaat Jeremiassen isumaqarpoq.

- Naalakkersuisoqarfimmut tatiginninnerput tassunga killeqarpoq, KNAPK-mi siulittaasoq Nikkulaat Jeremiassen KNR-mut taama oqarpoq.

- Piffissanngorpoq allannguisoqarnissaa, naalakkersuisunullu kinguneqartitsisoqartariaqalerpoq.

KNAPK-mi siulittaasoq Nikkulaat Jeremiassen

Taakku taama oqarnerat ombudsmandip Piniarnermut naalakkersuisoqarfimmut isornartorsiuineranik aallaaveqarpoq.

Aamma atuaruk Abelsen arnanik persuttaasarneq pillugu: - Ernumanartupilussuuvoq

Suliami matumani Ombudsmandip tikkuagaa unaavoq: Piniarnermut Aalisarnermullu naalakkersuisoqarfik inatsimmik tunngavissaqarani ataatsimoorussamik tikaagullinniarnissamut qinnuteqaatinik itigartitsisarsimanera. Ombudsmandilu Vera Leth naapertorlugu, aappassaanik inatsiseqartsitsinikkut tunngavissaasumik unioqqutitsisoqaqqippoq, inatsimmi taanna aqqutigalugu innuttaasut piginnaatitaaffeqarnermikkut illersorneqartussaapput oqartussaasullu innuttaasunut nalinginnaliorlutik pinnginnissaannik qulakkeerinnittussaalluni.

Suliaq nassuiarneqarpoq

Novembarimi 2022-mi Aalisarnermut Piniarnermullu Naalakkersuisoqarfik ataatsimoorluni piniagassanik tikaagullittassinneqarnissamik qinnuteqaammik itigartitsivoq.

Aalisanermut Piniarnermullu Naalakkersuisoqarfiup itigartitsinerminut tunngavigisaa tassaavoq tikaagullinniarnermi piffissaliussaq patsisigineqarmat, piffissaliussarlu taanna decembarimi 2021-mi naalakkersuisunit aalajangerneqarpoq.

Ombudsmandip misissuineranut tunngatillugu naalakkersuisoqarfik ilisimatitsivoq, naalakkersuisoqarfiup itigartitsilluni aalajangernera inatsisinik atuuttunik tunngavissaqartoq.

Ombudsmandip naalakkersuisoqarfik ilaatigut isornartorsiorpaa inatsiseqartitsinikkut tunngavissanik malinninnginnerarlugu, malittarisassarmi taanna pingaaruteqartuuvoq inuttaasut piginnaatitaaffii illersorneqassappata. Naatsumik oqaatigalugu, inatsiseqartitsinikkut tunngavissamik malinnittussaaneq tassaavoq; oqartussaqarfiit aalajangigaat iliuusaallu tamarmik inatsimmik atuuttussaatitaasumik malittussaatitaanerat, allatut oqaatigalugu, oqartussat nalinginnaq piumasarsorlutik ilioqqusaanngillat, inatsimmilu allassimasut kisimik malinneqartussaatitaasut.

Ombudsmandittaaq Aalisanermut Piniarnermullu naalakkersuisoqarfik isornartorsiorpaa, 2021-mi kukkussutigeriikkami assinganik kukkoqinnerarlugu.

Allisiguk

Naalakkersuisoq qisuarianngilaq

Aalisartut Piniartullu kattuffiata KNAPK-p Aalisarnermut Piniarnermullu naalakkersuisoqarfik arlaleriarlugu suleqatiseralugu attavigisaraluarpaa. Uterfigineqassananili.

Suleqatiginninniartarnerigaluarlu taamatut ilusilik KNAPK-mut angujuminaappoq, KNAPK-lu susaaginnartariaqartartoq, Nikkulaat Jeremiassen nassuiaavoq.

- Naalakkersuisumut allagaqarput tatiginnikkunnaarnerpullu nalunaarutigalugu. Aalisarnermut, Piniarnermullu naalakkersuisoqarfimmut arlalippassuariarluta saaffiginnissutinik allattuartaraluarpugut akineqanngisaannarpugulli, taamaattumik tatiginnikkunnaarluta nalunaarfigaagut, taanna oqarpoq.

Ilaasortaminnullu tunngasumik ikioqqullutik naalakkersuisumut saaffiginninnerigaluit marluk assersuutigai.

Pisup aappaa Kulusummi uuliakoortoqarneranut tunngavoq, taamanimi dieseli 120.000 literi imaanut kuuppoq taamaalillunilu piniartut aalisartullu piniarsinnaajunnaarput. Pisup aappaa Qaanaami aalisartut piniartullu sikup qajannarsinera pillugu ukioq piniarsinnaajunnaarput. KNAPK-lu naapertorlugu taakku pillugit naalakkersuisumut saaffiginnittarnerigaluatik akineqarneq ajorsimapput.

Kukkussut uteqqittoq

Suliamut matumani eqqartukkatsinnut assingusumik ombudsmandi 2021-mi aamma uparuaavoq, taamanilu naalakkersuisoqarfik nassuerpoq eqqartuussinermut tunngasumik ingerlaaseq nalinginnaasumik malitassaq malinngitsoorsimagini. Taamanikkut qaleralittassiinissamut qinnuteqartoqarpoq itigartitsisoqarlunilu.

Naalakkersuisoqarfik inatsiseqartsitsinikkut tunngavissaasumik unioqqutitseqqippoq, Vera Leth taama oqarpoq.

Naalakkersuisoqarfillu tamatuminnga kingumut naqqippaa, taamanimi Aalisanermut naalakkersuisoqarfiup kukkunini nassuerutigaa.

Maannali naalakkersuisoqarfik kukkuluttoqqippoq.

“Naalakkersuisoqarfiup kukkunermik siusinnerusukkut nassueritigisimasaminik kukkussuteqaqqinnera ernumanartuuvoq ajornartorsiuterujussuullunilu. Uanga paasinninnera unaavoq Naalakkersuisoqarfiup aqutsinini inatsiseqartitsineq atuuttoq Inatsisartunit akuerineqarsimasoq tunngavigalugu tamatigut piareersartartussagaa, tamannali suliami matumani pisimanngilaq”, Vera Leth tusagassiutinut nalunaarummi taama oqarpoq.

Taanna naliliivoq, kukkuneq annertoorujussuusoq aammalu suliamik sumiginnaasoqartoq.

- Inatsit unioqqutinneqaraluartoq kinguneqartitsisoqanngilaq

Nikkulaat Jeremiassen isumaqarpoq, suliaq imminiiginnarneqassanngitsoq naalakkersuisullu iliuusaa akuerineqarsinnaanngilluinnartoq.

- Allannguisoqarnissaa piffissanngorpoq, naalakkersuisunilu kinguneqartitsisoqartariaqalerpoq, tamannami imminiiginnarneqarsinnaanngilaq, taanna oqarpoq nangipporlu:

-Inatsisinik uniuinerit kinguneqartinneqartuaannartarnikuupput, taamaattumik una pisoq attanneqarsinnaanngilluinnarpoq, taanna erseqqissaavoq.

Inatsiseqarnermut ataatsimiititaliaq suliaq pillugu oqaaseqarusunngilaq.

Taamatuttaaq KNR-imi nutaarsiassaqartitsiviup piffissaq killiliussaa sioqqullugu Aalisanermut Piniarnermullu naalakkersuisoqarfik apersorniaraluarparput akineqanngilagulli.