Abelsen arnanik persuttaasarneq pillugu: - Ernumanartupilussuuvoq
![](/sites/default/files/styles/image_934x467/public/article_images/martha_abelsen.png?itok=OeXpJqxf)
Nunatsinni arnat 62 procentii persuttagaanermik aqqusaagaqarsimapput.
Isumaginninnermut naalakkersuisoq, Martha Abelsen (S), qimarnguiit siunissaat pillugu ataatsimiinneq marlunngormat ammarneqarmat taama oqarpoq.
- Ernumanartupilussuuvoq, sammisaallunilu oqaloqatigiissutigissallugu pingaaruteqartoq, Martha Abelsen oqarpoq.
Angerlarsimaffimmilu persuttaasoqartarnera pillugu ilisimasat nalinginnaasumik amigaatigineqarput. Suliniutip Kattunnerup qimarnguinni isumaginninnikkut sulisut piginnaanngorsarnissaannik suliaqarfiusup misissuinerata tamanna takutippaa.
Apeqqutit akisassat sulisunut nassiussuunneqarsimapput.
Ilisimasaqarnerusariaqartut
Misissuinermi ilaatigut paasineqarpoq sulisut apeqqutinut akissuteqartut 8 procentii isumaqartut angerlarsimaffimmi persuttaasoqartarnera allat susassarinngikkaat.
56 procentillu akipput persuttarneqartut persuttarneqarnerminnut namminneq akisussaaqataasut.
Taamatullu isumaqartoqarnera inuit ikiortissarsiortut qanoq naapinneqartarnerinut sunniuteqartartoq, Simone Bodholdt Maryfondenimeersoq oqarpoq. Aningaasaateqarfiup Kattunneq suleqataaffigaa.
AAMMA ATUARUK Persuttaanermik eqqugaasut sullinneqarnerat pitsanngorsaaviginiarneqarpoq
Akuliukkumannginnerlu Kattunnermit sulisut akornanni naammattoorneqartoq pissutigalugu, pingaartumik meeqqat angerlarsimaffimmi persuttaasoqartarneranik aqqusaagaqartartut naammaginartumik ikiorserneqanngitsoortarput. Taamaammat Kattunnermit kaammattuutigineqarpoq meeqqat pillugit angusassamik toraagaqarluni suliniuteqartoqassasoq.
Aammattaaq sulisut ilinniartinneqarnissaat kaammattuutigineqarpoq. Tamanna misilittakkanik avitseqatigiinnissamut periarfissanut pitsaanerulersitsissammat qaffasinnerusumilu siunersiueqatigiinnissamut aammaassalluni, Kattunnermeersut, sulisunut ilinniartitsissutinik saqqummersitseqqammersut, taama isumaqarput.
Aammattaaq qimarnguiit, pingaartumik imminnut ingerlatittut, piginnaasanik atassuteqaatinillu ineriartortitsisariaqartut oqaatigineqarpoq.
AAMMA ATUARUK Angerlarsimaffinni persuttaasoqartarnera pillugu atuartitsissutit nutaat
Qimarnguiillu ilaata, Illernit, nuna tamakkerlugu qimarnuik katsorsaaviutigisup, persuttaasarnerit assigiinngitsut tallimat saqqummiuppai. Persuttaanermi nakuuserneriinnaanngilaq, katsorsaavimmeersoq Stine Mølgaard nassuiaavoq.
- Arnat ilaqarput persuttagaanermik atugaqarnerminnik ilisimasaqanngitsunik. Persuttaanermi nakuuserneriinnaanngilaq: Aamma tassaasinnaapput tarnikkut, aningaasatigut, pigisatigut kinguaassiutitigullu persuttaanerit, Stine Mølgaard oqarpoq.
Ilaqutariinni arnanik persuttaasoqartarnera meeqqanut sunniuteqarnerluttarpoq. Stine Mølgaardillu nukappiaraq anaanani ataataminit persuttarneqaraangat anaanaminik illersuisarsimasoq oqaluttuaraa.
- Taanna inersimasunngoruni aapparisani nakuuserfiginngisaannarniarlugu aalajangersimavoq, taamaammat ilaqutariit tamarmiutillugit katsorsarneqarnissaat pingaaruteqarpoq, Stine Mølgaard oqarpoq.