Tatiginnikkunnaarnissamik siunnersuut Naalakkersuisut pinngitsoortippaat

Inatsisartut ippassaq ataatsimiinneranni immikkoortoq kingulleq - tassalu Landskarsip siorna naatsorsuutaanut tunngasoq pissanganartorsiorfiuvoq.
novembarip 10-at 2011 06:39

Taama pisoqarpoq naatsorsuutit Siumup sakkortuumik isornartorsioreerlugit Naalakkersuisunik tatiginnikkunnaarnermik taasinissamik siunnersuuteqarmata. Taamatulli siunnersuuteqarnerigaluaq oqaluuserisamut tullermut ingerlaqqinnissamik siunnersuuteqarnikkut itigartinneqarpoq.

Siumukkut isornartorsiuinerminni taakkartorpaat naatsorsuutit upernaaq katersornermut piareersimannginnerat, taamatullu pisoqarsimavoq missingersuutit aamma aningaasartuutinik aqutsinerlunneq naatsorsuutinik kinguaattoortitsisimammata. Naatsorsuutigineqaraluarpoq 268 millioner koruuninik amigartoortoqassasoq, landskarsili 2 millioner koruuninik sinneqartoorpoq, tassa naatsorsuutigisamit 270 millioner koruuninik pitsaanerusumik angusaqartoqarluni.

Taamali inissittoqarnera Siumukkut pitsaasumik taajumanngilaat.

- Naalakkersuisut 2009 aallartiffigalugu nunaqarfinni illoqarfinnilu ineriartorneq unitsippaat. Naalakkersuisooqatigiit aningaasat pingaarnerutissimavaat innuttaasut pisariaqartitaat tunulliullugit, Siumukkut oqarput.

Siumukkut uniffigisaasa ilagaat allaffissornikkut 21 millioner koruuninik atuinikinnerusimaneq. Ilaqutariinnermut Naalakkersuisoqarfik siorna 20 millioner koruuninik atuinikinnerusimavoq aammalu siusinaartumik soraarnerussutisialinnut tunniunneqartartut naatsorsuutigisamit 17 millioner koruuninik ikinnerullutik.

Siumut oqallinnermi saqqummiussaminni taakkartorpaat Naalakkersuisut ivertinneqarnerminni neriorsuutigisimagaat tutsuiginartunik patajaatsunillu naatsorsuusiortarnissaq. Naalakkersuit aamma ilanngussimavaat ilassutitut aningaasaliissutissatut qinnuteqaatit pisassanngitsut. Taamatulli siunnerfeqarneq qatagiinnarsimasoq taakkartorneqarpoq.

Kisianni tassa tatiginnikkunnaarnermi taasititseriarneq Siumukkut iluatsinngilaat tassalu pingajussaa Naalakkersuisut uppiseriaraluartarpaat iluatsinngitsumik.