Tasiilarmiut killilersuutinut akerliussutsimik takutitsilersut
Nunarput tamakkerlugu coronamut killilersuutit ippassaq atuutilerput.
Tasiilami nunaqarfiinilu innuttaasut akornanni coronamik tunillatsissimasutut massakkut nalunaarsorsimasoqanngilaq, innuttaasullu 90 procentii sinnerlugit aappassaanik akiuussusersimallutillu pingajussaanik akiuussusersorneqaleruttorput.
Nunap sinnerani innuttaasut 68 procentii aappassaanik akiuussuserneqarsimapput.
AAMMA ATUARUK Nunatsinnut angalasut misissortittarunnaartut sumiiffinnilu killilersuutit nuna tamakkerlugu atuutilersut
Taamaakkaluartoq Tasiilami innuttaasut coronamut atatillugu sukannersunik killilersuiffigineqarput.
Nunatsinni tamarmi tamanit iserfigineqarsinnaasuni coronapas atuutissaaq.
Tassa neriniartarfinni, imerniartarfinni, filmertarfinni, katersortarfinnilu assigisaanilu.
Ukununnga isissaguit qanermut assiaquteqassaatit:
- Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
- Bussinut taxanullu ilaanermi.
Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
Imigassamik nioqquteqarneq nunatsinni kommuninit tallimanit sisamani februaarip aallaqqaataanut imaluunniit ulluisa qulingiluaannut inerteqqutaagallarpoq.
15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit.
Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.
Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
Tamannalu akerlilerniarlugu Tasiilami innuttaasut sisamanngornermi nalunaaqutaq marlunut sumiiffimmi kommunip silataani akerliunerminnik takutitsiniarput.
- Coronamut killilersuutit peqqutaapput. Naammaginarunnaaramik, neriorsorneqarnikuuvugut kapitikaareerutta ammaassiffigineqassalluta.
Innuttaasunut akerliusunut katersuutsitsinissamut aaqqissuisoq, 37- nik ukiulik, Aron Kristiansen taama oqarpoq.
Taanna illoqarfimmi ulluinnarni taxartitsisuuvoq.
AAMMA ATUARUK Borgmesterit imigassaarniaqqusinnginnermut: Fase 3-miippugut fase 4 ajornerpaajusoq
Tasiilami nunaqarfiinilu innuttaasut pingajussaanik akiuussuserneqaleruttorput, aappassaanillu akiuussuserneqarsimasut 90 procentinit amerlanerusut nunatta nakorsaaneqarfiata KNR-imut paasissutissiissutigaa.
Taamatullu Tasiilami nunaqarfiinilu Covid-19-imik tunillatsissimasutut nalunaarsorsimasoqanngilaq.
- Tasiilaq coronaqarfiunngilaq, paasineqartariaqalerpugut maani killersuutit atuukkunnaarnissaannut. Taamaattumik maani killilersuinissaq pisariaqanngilaq, Aron Kristiansen oqarpoq.
Innuttaasut tamarmik PCR-imik misissorneqartarunnaarmata, tunillatsissimasut tamarmik nalunaarsorneqarneq ajorput.
Nunattali annersaani coronap tuniluuttorujussuusoq nalunanngilaq, tunillaassuunnerlu unikaallatsinniarlugu nunarput tamakkerlugu kikkut tamarmik iserfigisinnaasaanni soorlu pisiniarfinni, bussini, taxani, allakkerivinni, mittarfinni assigisaannilu qanermut assiaquteqarnissaq, tamakkiisumillu akiuussusertissimanermut uppernarsaammik takutitsinissaq piumasaqaataalerpoq.
Corona siammatsaaliorneqarpoq
Tamannalu paasinannginnersoq aperaarput:
- Aap paasinarpoq kisianni uagut coronaqarfiunngilagut, innuttaasullu amerlanerpaajulluta pingajussaanik akiuussusertinnikuuvugut. Neriorsorneqarnikuuvugut innuttaasut 80 procenti missaat kapitikaagutta ammaassinissaq periarfissaasoq. Kisitsisit takutippaat innuttaasut 90 procenti sinnerlugu Tasiilami nunaqarfiinilu innuttaasut akiuussusertissimasut, Aron Kristiansen KNR-imut oqarpoq.
