Politikki

Tasiilap eqqaani qilalukkat nalunaarsorneqalersut

Tasiilap eqqaani qilalukkat qernertat qanoq amerlatiginersut misissorneqartussanngorput. Namminersorlutik Oqartussat 500.000 koruuninik aningaasaliipput qilalukkanik qernertanik nalunaaqutsersuinissaq pillugu misileraalluni suliniummut atorneqartussanik.

Allattoq Inge S. Rasmussen

apriilip 21-at 2016 11:25

Nutserisoq Jaaku Lyberth

Suliniut siunissami qilalukkat qernertat amerlassusaannik biologit pitsaanerusumik siunnerfeqarnerusumillu misissuisarnermik malitseqarsinnaavoq.

- Ilisimasanik annertunerusunik katersinissaq pingaaruteqarpoq, taamaalilluta qilalukkat qernertat siunissami piujuartitsiviusussamik piniarneqartarnissaat siuarsaavigisinnaallutigu. Suliniut taanna tamatumunnga iluaqutaasinnaavoq, Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko tusagassiuutinut nalunaarummi taama oqaaseqarpoq.

Aamma atuaruk Pinngortitaleriffik qilalukkat qernertanik Tunumi kisitsilerpoq

Biologit maannakkut siunnersuisarneranni 2008-imi kisitsinernit uumasut amerlassusaannik missiliuineq aallaavigineqartarpoq, taannalu ullumikkut annertuumik nalorninartortaqarpoq Pinngortitamut, Avatangiisinut Inatsisinillu Atuutsitsinermut Naalakkersuisoqarfik taama nalunaaruteqarpoq.

Tunumi qilalukkanik qernertanik kisitsinissaq aasamut pilersaarutigineqarpoq.