Pinngortitaleriffik qilalukkat qernertanik Tunumi kisitsilerpoq
![Qilalugarniaq Tasiusarmioq](/sites/default/files/styles/image_934x467/public/user_pictures/HardVilhelmLynge_Qaqortoq__tasiusarmioq_qilalukkereisoq.jpg?itok=CA3oX5k-)
Pinngortitamut, Avatangiisinullu Naalakkersuisoq, Mala Høy Kúko, Tunumi qilaluaqassuseq pillugu paasisaqarnerorusulluni Pinngortitaleriffimmut pulaarmat, ilisimatuunut tamanna nutaarsiassaq nalunaarutigaat.
Tamanna Mala Høy Kúkop Tunuliarluni qilalukkanik qernertanik pisassiissutinik sooq Naalakkersuisut ikililiisimanerannik piniartunut nassuiaajartornissaa sioqqutilaarlugu pivoq.
NAMMCO-minngaanniit, ilisimatuut pinngortitaq pillugu siunnersuisartut, siunnersuutigisimavaat qilalugaqatigiit qernertat, Ittoqqortoormiit Tasiilallu eqqaanniittut 2008-mili ataasiaannarlutik kisinneqarsimammata, ikinnerusunik pisassiisoqartariaqartoq.
Pinngortitaleriffimmiit Tunumi qilalukkat qernertat 2010-mili misissugarisarsimavaat, ilaatigut qaammataasakkut nassitsissutinik qilalukkat qernertanut 30-inik amerlanerusunik ikkussuisoqarsimalluni. Qaammataasakkut nassitsissutit iluaqutigalugit, qilalugaqatigiit marluusut, Tasiilap Ittoqqortoormiillu eqqaanni paasineqarpoq.
Tunumi qilalukkanik qernertanik ukioq manna kisitsinissaq 2008-mi periaaserineqartoq atorneqassaaq. Pinngortitaleriffiup Tasiilami piniartut suleqatigalugit qilalugaqarfiit paasiniarneqassapput.
Aasakkut 2017-imi kisitsineq qilalukkat qernertat qanoq immap iluani qaartitsillu sajuppillatsitsinernit misissuinernit sunnerneqartarnerannik, qanorlu umiarsuarnillu sikunik aserorterutinit sunnerneqartarnerannik misissuinernik malitseqassaaq.
Qilalukkat qernertat pillugit ilisimatuut pinngortitaq pillugu siunnersuinerat tulleq 2017-imi pissaaq.