Tasiilami suliffissaaleqisut amerleriaateqangaatsiarput
Tunumi illoqarfiit annersaanni Tasiilami sanaartortorneq namminersortuni kommunemilu ingerlalluaraluartoq, suliffissaaleqisut 117-init ukiup ataatsip ingerlanerinnaani 197-nngorsimapput.
-Ajuusaarnarpoq kisitsit taama annertutigisoq tusarlugu. Kommunemiimmi qinikkat tunumi suliffisaqartitsiniarneq pitsanngorsaaviginiarlugu sulingaatsiarsimagaluarpugut. Suliffissaaleqisut qaffariaateqarnerat arlalinnik peqquteqarsinnaavoq. Pissutaasut ilagisinnaavaat siusinaarlutik utoqqalinersiutillit suliffissarsiorlutik allatsittalersimaneri. Soorli taama amerleriartigisimaneri nassuiaruminaappoq, Justus Hansen Demokratinit inunnik isumaginninnermi, suliffissaqartitsiniarnermilu ataatsimiititaliami Kommuneqarfik sermersuumi ilaasortaasoq taama oqarpoq.
Aalisarnermi sanaartornermilu pissutsit atuuttut aamma suliffissaaleqisut qaffariaateqarnerannik tunngaviusinnaapput. Ataavartumimmi aalisakkanik tunisisannginneq aamma suliffissanik ikilisaasuusarpoq.
-Kommunep sanatitsisut sanasussallu isumaqatigalugit aningaasaliisartutut suleriaatsini qimannikuaa. Maannalu sanasut namminersortut tamanna tunngavigalugu sulisuminnik ikilisaasimassapput. Tassumalu saniatigut aalisartut aningaasanik amigaateqaleraangamik aalisapiloortarput, aningaasallu nungunnissaata tungaanut aalisanngissinnaasarlutik. Taamaalillunilu nunaqarfiit ilaanni tunitsiviit ataavartumik sulisutik sulisisinnaasanngilaat. Tamanna ajoraluaqaaq, Justus Hansen nammineerluni Tasiilami najugaqartoq taama oqaluttuarpoq.