Tasiilami imigassamik inerteqquteqaqqusisoq: Allamik imminut toquttoqarnissaa ernumassutigigatsigu
- Siullermik septembarip aallaqqaataani imminut toqutoqarpoq. Taanna ajoreerpoq. Aqaguanili allamik aamma imminut toquttoqarpoq.
Tasiilap napparsimmaviani peqqissaasuuneq septembarip aallartinnerani nalinginnaanngitsumik ulapputtoqarnera, Tasiilami nunaqarfiinilu imigassamik nioqquteqarnerup sapaatini akunnerni marlunni matuneqarneranik kinguneqartoq pillugu oqarpoq.
- Aamma imminnut toqunnissaminnik siorasaaruteqartoqarpoq. Aalakoornermini nissuminik napisoqarpoq. Alla aalakoornermini siffiaarserpoq. Pinngitsaaliinikkut atornerlugaasoqarpoq. Aamma alla allanit unatarujussuarneqarsimavoq.
- Taassuma kimit persuttarneqarnini takuniarlugu qummut qiviarniartarsimalluni oqaatigaa, qummmulli qiviaraangami kiinamigut isimminneqartarsimavoq.
Sulisut aliasuttut
Sapaatip akunnerani ulapputtoqangaatsiarneranut akissarsisoqarlunilu akileraarutinit utertoortoqarnera pissutaavoq. Ajornartoortoqangaatsiarporlu allaat peqqinnissaqarfimmi sulisut suliassanut malinnaasinnaajunnaarlutik.
- Tamanna napparsimmavimmi ulapputigineqangaatsiarpoq. Taakkulu pinnginnerani kræftimik napparsimasorpaaluit uninngapput, piffissamilu tassani aamma piartortoqarluni. Aamma meeqqanik uninngasuuteqarpugut, isit nakorsaat maaniinnera pissutigalugu inuit 60-init amerlanerusut isip qasertittarneranik suliaritipput. Assigiinngitsorpassuillu pineranni suliffimmik ingerlatsiniarneq ajornakusoorpoq.
- Tasiilami nunaqarfiinilu septembarip 17-iata tungaanut aalakoornartutalinnik imigassaarniarneq matuvoq.
- Tamanna niuertarfinni imerniartarfinnilu atuuppoq.
- Nunaqarfiit tassaapput Kuummiut, Isertoq, Tiilerilaaq, Sermiligaaq Kulusullu.
- Kalaallit Nunaata kangiani kimittuunik imigassaarniartoqanngilaq.
- Tasiilami nunaqarfiinilu Ittoqqortoormiinilu, aalakoornartutalinnik imigassanik 15 procentinit kimittunerusunik sassaalliineq tuniniaanerlu inerteqqutaavoq.
Akissarsiffiup utertooruteqarfiullu nalaani illit nammineq sulivit? Ullullu taakku qanoq misigivigit?
- Ulluunerani sulivunga. Aamma unnukkut sulillunga tarrarsuillunga assiliivunga, aamma imminut toquttoqarnera kingulleq pillugu oqaloqatigiippugut.
AAMMA ATUARUK Tasiilami politiit: Sapaatip akunnerata siulia tamarmi eqqissisimasoqarpoq
Sulisut tamatuma kingorna suliartoravit qanoq ippat?
- Sulisut pingaartumik imminut toquttoqarnerata kingorna aliasupput. Imminnut tapersersorniarsaralutillu ajunngitsumik imminnut oqaluunniarsaripput.
- Kisianni soorunami suliat taama ittut amerlasuut nalaatereernikuugaluarigut – uku inuusuttut imminut toqunnerat – uatsinnut sunniuteqarput. Taamaammat qullipinnartarpoq. Aamma aliatsattoqartarlunilu nikallortoqartarpoq. Kisianni immitsinnut tapersersorlutalu ikioqatigiippugut.
Kommunimut attaveqartoq
Taamaammat tassunga tunngaveqartumik iliuuseqarpoq. Tassuma kommuni attavigaa.
- Taamaammat sisamanngorneq septembarip ulluisa aappaanni unnukkut kommunimut saaffiginnippunga. Imigassap sapaatini akunnerni arlalinni matuneqarnissaa qinnutigaara, taamaaliornikkut sulinissatsinnut akornuserneqassanata. Aamma meeqqat inuusuttullu eqqissisimatinneqassallutik, John Christensen oqarpoq.
- Unnukkut issiallunga annertuallaartoq eqqarsaatigaara. Allanik imminut toquttoqarnisaa ernumagingaatsiarparput. Imminummi toquttoqarnerata kingorna allamik imminut toquttoqarpoq. Taamaammat pingajussaanik imminut toquttoqarnissaa utaqqiinnapajaarparput. Taamaattoqaraangammi tuniluuttutupajaaq ittarpoq.
AAMMA ATUARUK Tasiilami inissaaleqineq neriuuteqannginnerlu unammillernartut
Sukkalaartorujussuarmik iliuuseqartoqarpoq. Imigassamik nioqquteqarneq aqaguani matuneqarpoq.
- Tamanna nuannaarutigingaatsiarparput, napparsimasummi isumaginissaannut piffissaqalerpugut. Siarnguttorpassuaqanngilaq - maanngartullu napparsimanermik pissuteqarlutik imigassamik pissuteqanngillat.
Sapaatip akunnerata naanissaa ernumassutigigaa
Imigassamik nioqquteqarnerup inerteqqutigineqarnera tallimanngorpat ilanngullugu atuuppoq. Tamatumami kingorna?
- Assingusumik nalaataqaqqinnissarput ernumassutigaara. Soorunami qaammatip aallartinneratulli aningaasat taama amerlatiginngillat. Kisianni anersaartulaarnissatsinnik aamma periarfissaqalaareerunarpugut.
- Piffissami sivikitsuinnarmi matusineq iluaqutaanngilaq. Imigassap matuneqaannarnissaa kissaatigineqanngilaq – kisianni immaqa imigassamut politikkimik killilersuinerulaartoqaruni pitsaassaaq? Immaqa sumiiffimmit ataasiinnarmit tuniniaasoqaruni pisiniarfinni tamani tuniniaasoqarani. Pisiniarfinni imigassamik arfininngornikkut nioqquteqartanngikkuni isumatsialaasinnaasoq eqqarsaatiginikuuara, imerniartarfiillu sapaammi matoqqallutik. Tamanna meeqqanut pitsaasumik sapaatip akunnerata naaneqartitsisinnaavoq inuillu atasinngornermi suliartornissaannut qulakkeerinerussagaluarpoq.
AAMMA ATUARUK Tage Mikiki frygter, når alkoholsalg åbner i Tasiilaq: Vil vi miste vores kære?
- Tarnip pissusianik ilisimasalinnik marlunnik illoqarfitsinniittuaannartoqarnissaa kissaatigivarput. Taakku inuusuttunut ikiuisinnaassapput imminullu toqunnissamik siorassaaruteqarnermik kingunerluuteqarnermillu isumaginnissinnaassallutik. Nalunaarsuisoqaannaranimi piviusumik akuusoqarnissaa pitsaassagaluarpoq.
Tasiilami ippassaq unnukkut innuttaasunut ataatsimiititsisoqarpoq, tassani inuit 250-it takkupput, taakkulu maanna susoqarnissaa oqallisigaat.
- Inuit inuiaqatigiinni qanoq pitsaanerusumik angusaqarnissaq pillugu oqalliffissaqalernissaanik utaqqisimarpasipput, John Christensen oqarpoq.
