Tasiilami meeqqanik inuusuttunillu sullissisussaaleqisut
Kommuneqarfik Sermersooq Tasiilami isumaginnittunik arfinilinnik sulisoqarsinnaavoq. Marluk maanna sulisorineqarput taartaasullu marluk aamma sulilerallaqqammerlutik.
Sulisukinneralumi sunniuteqaqisoq, Tasiilami ilinniartitsisoq aamma meeqqat inuusuttullu nalunaarutigineqartut pillugit akisussaasuusoq, Rikke Blegvad oqarpoq.
AAMMA ATUARUK Tasiilami meeqqat inuusuttuaqqallu sumiginnagaanerat ajorluinnarpoq
AAMMA ATUARUK Sermersuumi isumaginninnikkut nakkutilliineq illersorneqarsinnaanngilaq
Kommuneqarfik Sermersuumi meeqqanut ilaqutariinnullu ingerlatsivimmi pisortap Martha Lund Olsenip ajornartorsiut ilisarisinnaavaa:
- Taanna nalunaarusiami siornali ersippoq.
Kommunip Tasiilami ataavartunik sulisussarsisinnaannginnera matumani pissutaasoq, Martha Lund Olsen oqarpoq.
- Sulisussarsioratta atorfinissinnaasunik qinnuteqartoqarsimanngilaq.
Namminersorlutik Oqartussat immikkoortortami nakkutilliinerminniit nalunaarusiaat Rikke Blegvadilu naapertorlugit Tasiilami meeqqanut ilaqutariinnullu sullissinerup ingerlaavartuunnginnera ajornartorsiutaavoq.
Sulialli tamarmik assigiimmik sukkasuumillu kommunimi tamarmi suliarineqartalernissaat qulakkeerniarlugu kommuni, poorskimi atuutilersumik, periuseqalerpoq.
AAMMA ATUARUK 520 socialsager på børneområdet i Tasiilaq
AAMMA ATUARUK Aviaja Tasiilami meeraanermini sumiginnagaasimavoq
Tassa saaffiginninniartut oqarasuaammut e-mailimulluunniit ataasiinnarmut saaffiginnissinnaalerput.
- Tassa taanna qulakkeerniarlugu suleriaatsigut allanngortippagut, soorlu taanna Tasiilami ilinniartitsisoq meeqqanik ernumagisaqaruni maanga mailitsinnut nalunaarutigissavai.
Saaffiginnissut akunnerit 24-t iluanni isummerfigineqassaaq taava aamma suliap misissorneqarnissaanut iliuusissarsiornissamullu qaammatit marluk ingerlanerini nalilersuisoqarsinnaalluni.
- Tasiilaminngaanniit suliassanik tigusaqartalereernikuuvugut aamma taamatut suliarineqarput, Kommuneqarfik Sermersuumi meeqqanut ilaqutariinnullu ingerlatsivimmi pisortaq Martha Lund Olsen oqarpoq.
Meeqqat inuusuttullu pillugit saaffiginninniartut meeqqavut@sermersooq.gl-imut allagaqarsinnaapput.
