Tasiilami isumaginninnermi suliat 520-it
Innuttaasut inatsisitigut isumannaatsumik pineqarnissaannut tamanna ajoqutaasoq, nalunaarusiap naqissuserpaa.
Meeqqat inuusuttullu pillugit isumaginninnikkut suliat ingerlasut 520-it Tasiilami isumaginninnikkut ingerlatsivimmi sulisunit pingasunit suliarineqarput. Isumaginninnermut siunnersortit marlupput, perorsaanermullu tunngasumik ilinniagalik aqutsisuujutigalunilu siunnersortitut sulisoq ataasiulluni.
Taamaasilluni agguaqatigiisillugu isumaginninnermut suliassat 170-it sulisup ataatsip suliassarai.
"Sulisumut ataatsimut suliat amerlanerujussuat isumaginnittoqarfimmi sulinermi atugassarititaasut eqqarsaatigalugit naammaginanngilluinnartoq", nalunaarusiami allaaserineqarpoq.
Suliassallu amerlammata, sulisut inuttut suliamullu pikkorissusaat eqqarsaatigigaanni, taakkuninnga naammassinninnissaat ajornartoq, aamma nalunaarusiami aallaaserineqarpoq.
Suliassat amerlangaarmata innuttassut inatsisitigut isumannaatsumik pineqarnissaat innarlerneqarpoq.
Meeqqat Innarluutillillu pillugit FN-imi isumaqatigiissutit tunngavigalugit meeqqat pisinnaatitaaffii innarlerneqartut nakkutilliisut naliliipput.
Nalunaarutiginninnerit iliuuseqarfigineqartannginnerat nakkutilliisut ernumagalugu immikkut maluginiarpaat.
Nalunaarutiginninnerit tiguneqartarput nalunaarsorneqartarlutillu, sulisulli piffissaaleqisaramik suliat iliinnartarpaat qaqeqqissanagillu.
Angummanniartuarneq pisinnaasakinnerlu pissutigalugit siunnersortit pinasuartumik suliarisariaqakkat kisinnagajaasa aaqqiigallarnertut suliarisariaqartarpaat.
Nalunaarusiaq naapertorlugu Tasiilami nunaqarfittaanilu meeqqat 986-iupput, taakkunanngalu 134-it angerlarsimaffiup avataani inissinneqarsimallutik. Taakku saniatigut meeqqat inuusuttullu angerlarsimaffiup avataanut inissinneqartarinaqarnersut pillugit suliat 36-it nakkutilliisut misissugassatut maluginiarsimavaat.
Taava aamma meeqqap pisariaqartitaa pinnagu suliat sivitsorunneri pissutigalugu sulianik matusisoqartarnera nakkutilliiartortut isornartorsiorpaat. Suliaq pillugu piffissap aalajangersimasup iluani saaffiginnittoqaqqissimanngippat suliaq kommunip matusarpaa, suliap sumut killissimanera apeqqutaatinnagu.
Innuttaasuttaaq naammagittaalliuutaat tamakkiisumik ilisimaneqanngillat. Meeqqat inuusuttullu pillugit isumaginninnermi suliat pillugit naammagittaalliuutit siunnersortinit Tasiilamiluunniit aqutsisunit tamakkiisumik kisitsisaataatigineqanngillat.
Kommuneqarfik Sermersuumi Meeqqanut, Ilaqutariinnut Atuarfeqarnermullu ataatsimiititaliaq aqagu sisamanngornermi ataatsimiinnerup kingorna aatsaat oqaaseqarumavoq.
