Tasiilami inuusuttut pillugit piviusulersaarut: Misiginikuusagut kinguaassatta misigissanngilaat
![](/sites/default/files/styles/image_934x467/public/oembed_thumbnails/2023-02/GNj7Vofx05M.jpg?itok=GaFHDRtE)
Inuusuttuunitsinni nalaannikuusagut kinguuaariit tullissatta nalaannikuusagut nalaatissanngippassuk taava issiaannarnissarput pisariaqanngilaq.
Piviusulersaarutip ilaani taama ersaritsigisumik oqariartuuteqartoqarpoq.
Piviusulersaarummi Tasiilami inuusuttut inuunerat takutinneqarpoq. Inuusuttut inuunerminnik siunissamut takorluukkatik nuannersut, inuusuttullu inuunerat nuannersut piviusulersaarummi oqariartuutigaat.
- Una filmeq siunissami angorusutatut takorluukkatsinnut tunngasuuteqarpoq. Soorlu inuusuttuuneq, maani illoqarfeeqqani inuunitsinni nuannersut nuanniitsullu ataatsimoortillugit takutippagut, 21-nik ukiulik, piviusulersaarummi Tsumu-mi inuttatut pingaarnerup marluusut aappaa Eino Taunajik oqarpoq.
AAMMA ATUARUK Eino Taunajik nersornaaserneqartoq: Maajunnartutut taaneqartarpunga
Taanna nammineq kajumissutsini aallaavigalugu Tasiilami inuusuttunut inersimasunullu 2017-imiilli isiginnaartitsinermik sungiusaasarpoq.
Eino Taunajik isiginnaartitsissusiani pillugit Naalakkersuisut kajumissaatitut nersornaasiuttagaannik 2019-imi tunineqarpoq.
Taanna nammineerluni Nuummut GUX-eriarluni nuunnikuuvoq - Eino pingasoriarluni Nuummut ilinniariarluni aallartaraluarpoq, tamatigullu angerlaannartarluni.
- Ilinniariarlunga Tasiilaminngaaniit aallaraangama inuttut piareeqqasutut misigisimasaraluarpunga. Angajoqqaakkali qimassimalerlugillu suli piareersimannginnera misigilertarpara. Taamaammat piviusulersaarut inuunitsinniit aallaveqartorujussuuvoq, Eino Taujanik oqarpoq.
Tasiilami inuusuttut inuunerat nuannersuusoq paasineqartariaqarpoq
Tasiilami inuuniarnermikkut ilungersunartunik aqqusaagaqarsimasut pillugit DR1-ip piviusulersaarutaa "Byen hvor børn forsvinder" 2019-imi saqqummiunneqarmat, nunatsinni innuttaasorpassuit politikerillu aalassatsinneqangaatsiarput.
- Tsumu tunumiut oqaaseraat isumaqartoq sumut .
- Piviusulersaarut Københavnimi filmfestivalertoqarnerani CHP:DOX-imi marsip 25-ani takuteqqaarneqassaaq.
- Piviusulersaarut kammagiit Lars, Eino Thomasilu Tasiilami inuunerannut tunngassuteqarpoq.
- Taakku kammagiit pingasut inuusuttut allat peqatigalugit, Tasiiilami imminut toqunnermut, atornerluinermut akerliunerminnik takutitsillutik misigissutsit atorlugit isiginnaagassialiorput.
- Piviusulersaarummi Eino Larsilu ukiut marluk ingerlanerini ilitsersuisumit Kasper Kiertznerimit malinnaaffigineqarput, taakku namminneerlutik imminnut filmiliarisarlutik piviusulersarut suliarineqaraat.
- Larsi Einolu neriuuteqarlutik sukataarnermi saniatigut aamma nalornineq pigivaat: Tasiilaq qimassavaat imaluunniit Tasiilamiiginnassappat? Allamut nuukkunik ilaquttaasa ikinngutaasalu amigaatigilissavaat. Aallanngikkunilli allamik inuuneqalernissaminnik takorluugartik qatangiinnassaaq.
Tamanna DR-ip isiginnaagassiaata aallakaatinneqarnerani Tasiilami meeqqat inuusuttullu atugarliungaatsiarneranik takutitsisoqarneranik aallaaveqarpoq. Suliassalli isumaginninnermut tunngasut nunatsinni isumaginninnermut siunnersortinit kivinneqarsinnaanngimmata, taamani isumaginninnermut Naalakkersuisoq, Martha Abelsen (S) danskit ministereqarfianut ikioqquvoq.
Pisoq sioqqullugu Kommuneqarfik Sermersuumi isumaginninnikkut atukkat ilungersunartut oqallisaangaatsiareersut pisortanut akerliussutsimik takutitsisoqarpoq, malitsigisaanillu borgmesteri, Asii Chemnitz Narup borgmesteritut tuniarpoq.
Danskit ministereqarfiat isumafinninnermut tunngasunik suliassanik oqilisaaniarluni taamani 80 millionit koruuninik aningaasaliivoq.
Piviusulersaarummi tassani Eino Taunajik peqataavoq, piviusulersaarulli saqqummersinneqarmat tassunga tupaallannarsimaqaaq, taannami eqqarsarsimanngikkaluarpoq taama sakkortutigisumik imalimmut peqataatinneqarluni.
AAMMA ATUARUK Eino Taunajik nersornaaserneqartoq: Maajunnartutut taaneqartarpunga
- Taamani inuusuttuaraaneroqaanga, sunarpiarlu pineqarniarnersoq qulakkeernagu peqataanikuullunga. Kingornalu assut ajussutiginikorujussuuara. Tamanilimi tunup isigineqarnera ajortippoq.
Eino Taunajik oqarpoq, nangillunilu:
- Tasiilami inuusuttut imminnut toquttut, imminut toqoriartut atornerlugaasimasullu taamaallaat takutinniarneqaramik. Taava massakkut uani saqqummersussami uagut aamma piviusut takutikkusuppargut, maani inuusuttuusugut qanoq inuuneqarnersugut.
Tsumu?
Piviusulersaarut “Tsumu” inuusuttut tungaanniit neriunnermik, akunnattoorfinnik, takorluukkap sorsuutigisinnaaneranillu takutitsineruvoq, inuusuttutnit nunarsuarmiunit tamanit tarrarsorfigineqarsinnaasoq.
- Isiginnaarlugu tiguarinnaqaaq, taassuma kammalaatima (pingaarnertut inuttap appaata Lars Korneliussenip) inuttut nukittuujunera takullugu torraaqaaq. Nalunngilarpullu allaniit takuneqarnissaa atorfissaqartinneqartoq, pingaartumik nunatsinni, Eino Taunajik oqarpoq.
Lars Korneliussen aamma Eino Taunajik piviusulersaarummi inuttatut pingaarnerpaapput.
- Assersuutigalugu aallarteqqaarnerani ajortumik inuuneqarneq takutinneqarpoq. Taava naggataani soorlu atuarnissaminut akuerisaasoq takutinneqarpoq, tassa inuunermi ingerlariaqqinneq, Eino Taunajik oqarpoq.
Piviusulersaarut Tsumu Tasiilami suliarineqartoq, marsip ulluisa 25-ani Københavnimi CPH:DOX-imi takuteqaarneqassaaq. Taassuma kingorna degitalikkut saqqummerumaarpoq, nunatsinni aamma takutinneqarumaarpoq.