Eino Taunajik nersornaaserneqartoq: Maajunnartutut taaneqartarpunga

- Uanga imaariarama nukappiaraq niviarsiaqqat pigisaannik nuannaartorisaqartoq niviarsiaqqanik kammaqartoq, Eino Taunajik oqarpoq.

Tamannalu allanit malugineqartarsimavoq akerartuisoqartarsimallunilu.

- Ilaanni aqqusinermi pisullunga arlaanit oqarfigineqariataartarpunga soorlu arnaasaq assigisaannilluunniit, maajunnartutut taaneqarlunga.

AAMMA ATUARUK Pipaluk K. Jørgensen kulturikkut nersornaaserneqartoq

Taanna Naalakkersuisunit kajumissaarummik inuiattut ullorsiornitsinni nersornaaserneqarpoq. Naalakkersuisut kajumissaatitut nersornaasiuttagaat 10.000 koruuninik aningaasataqarpoq.

- Illoqarfimmini Tasiilami inuusuttut peqatigalugit isiginnaartitsisarnikuuvoq ukiunilu marlunni isiginnaartitsisarnikuulluni. Sammisat soorlu imminut toqunneq, kinguaassiuutitigut kanngutsaatsuliorneq sammisallu oqallinnermik kinguneqartut ammasumik isummerfigalugit nunatsinni nunanilu allani malugineqarnikuuvoq. Inuusuttuuvoq piginnaasalik, oqallitsitsilersartoq inuttullu isummersuisartorujussuulluni – tamanna tunngavigalugu piginnaasamik nangitseqqinnissaanut ineriartortitsinissaanullu kajumissaarneqarpoq, Kultureqarnermut naalakkersuisoq Ane Lon Bagger nersornaasiinermut atatillugu oqarpoq.

Eino Taunajillu 18-inik ukoqartoq oqalugiarami ilaatigut ima oqarpoq.

- Uanga unaanikuuvunga, aqqusinikkut pisunnissaminik annilaangasoq, maajugineqartoq kanngugineqartoq kinaassuuseqanngitsutut isigineqartoq, Eino Taunajik oqarpoq.

Akerartorneqartarneralu imminut isigineranut kinguneqarpoq.

- Uanga taamani ilaaqqutiinnarnikuuvunga imminut maajunnartutut isigilerlunga.

Isiginnaartitsisarnerminili misigissutsini annissinnaasarsimavai imminullu ataqqinerulerluni.

- Paasilerlugu uanga taanna inuunerigiga oqilinikuuvoq iliuuseqarsinnaassusera takulerlugu. Taama pineqartarnera taamani ipianngunarpoq. Massakkulli uanga nuannaartorisakka aallutilerlugit taakkua soqutaajunnaarnikuupput, Eino Taunajik oqarpoq.

AAMMA ATUARUK Tasiilami inuusuttut imminut toquttarneq pillugu isiginnaartitsissusiortut

Sammisat artornartut, soorlu imminut toqunneq kinguaassiuutitigullu kannguttaatsuliorneq pillugit isiginnaartitsissusiortarnera nunatsinni nunanilu allani maluginiarneqarpoq, Naalakkersuisuniillu kajumissaarummik nersornaaserneqarluni.

Eino Taunajillu nersornaaserneqareernermini angerlarami akerartuisuniunngitsoq, kisanni tulluusimaartunit, nuannersunik oqaaseqartunit pilluaqusisuniillu tikilluaqquneqarpoq.

- Nunaqqatikka tulluusimaarput, oqaatsit nuannersorsuit ullormut tigoorartuaannarpakka. Suli maannamut tulluusimaarput, suli maannamut pilluaqqusipput.

Eino Taunajik isiginnaartitsisartutut ilinniarusukkaluarpoq maannakkuugallartorli piffissaqanngilaq, tassami USA-miut filmiliaanni inuttaaqataassussaavoq, DR-illu Tasiilami inuusuttuuneq pillugu piviusulersaarusiaani peqataasussaalluni.