Tasiilami corona pillugu ernumanartoqanngilaq – takornarialli maqaasivaat

Tasiilami innuttaasut coronamut ernumannginnerullutik corona pillugu malittarisassat malunnarnerupput. Tamanna najukkami ataatsimiititaliami ilaasortap oqaatigaa.
- Islandimit takornariat piffissaq maanna tikerarfigisaraluarmassuk tamanna isumaqartorujussuuvoq, Ole Nuko oqarpoq. Assi © : Peter Abelsen-Petersen
maajip 05-at 2021 05:41

- Akissarsiffiip nalaanni pisiniarfinni killilersuinerit aamma napparsimmavimmut kommunillu allaffianut isersinnaasut killeqarnerat malugineqarsinnaavoq. Corona pillugu illoqarfimmi oqaluttoqarpallaanngilaq.

Tasiilami najukkami ataatsimiititaliami ilaasortaq, Ole Nuko oqarpoq.

Tasiilami coronamik tunillatsittoqarnikuunngila.. Tunulu tamakkerlugu tunillatsittoqarnikuunani. 

Islandimit Tunumut nalinginnaasumik takornariaqartarpoq, Islandimulli aqqut qasseeriarluni piffissamilu sivisuumi corona pissutigalugu matoqqavoq.

AAMMA ATUARUK Islandip takornarianut akiuussutisserneqarsimasunut tamanut matut ammarai

Københavnimit nunatsinnut aqqut Naalakkersuisunngoqqammersut ammaateqqeqqammerpaat. Taamaakkaluartorli Islandip nunattalu akornanni aqqut matoqqaannarallartinneqarluni.

Namminersorlutik Oqartussanit akuersissummik pissarseqqaarani Københavnimit nunatsinnut ippassaq angalasoqarsinnaalerpoq. Aqqut taanna Danmarkimi tunillatsissimasutut uppernarsarneqartut amerliartuinnarnerat pissutigalugu decembarip naanerani matuneqarnikuuvoq.

Naalakkersuisulli killilersuinermut tassunga ippassaq qasukkaapput. Taamaalilluni timmisartumut nunatsinnukartumut ilaasut 600-t sapaatip akunneranut timmisartunut pingasunut agguataarsimasut, oqartussanit akuersissuteqarfigineqaqqaaratik ataasinngormamit maanna maajip ulluisa 31-ata tungaanut tikissinnaalerput.

Island piffissami sivisuumi matoqqasoq

Islandip nunattalu akornanni aqqut siorna novembarimili matuvoq.

Air Greenlandip Iceland Airillu aqqut taanna angallavigisarpaat.

Angalasut tamarmik sumiiffimmit ataatsimeersuunissat tassalu Københavnimeersuunissaat aamma timmisartumut ikinnginnermi misissortinnerit assigiinnissaat, Namminersorlutik Oqartussat piumasaraat.

AAMMA ATUARUK Nunatsinniit Islandimut angalariaannanngortoqartoq

Tasiilami innuttaasut Islandimit takornariaqartarnera maqaasigaat, Ole Nukop oqaatigaa.

Takornariaqannginnerami Tasiilami suliffeqarfinnut annaasaqaataavoq.

- Islandimit takornariat piffissaq maanna tikerarfigisaraluarmassuk tamanna isumaqartorujussuuvoq, Ole Nuko oqarpoq.

- Tasiilami tunillatsissimasoqarnikuunngitsoq sooq taama matoqqatitsisoqartigissanersoq Nuummilu qasseeriarluni tunillatsissimasunik uppernarsaasoqarfiusimasumi ammatitsinerusoqassanersoq inuit apeqqutigigajuppaat.

Nunatta ammaativinneqarnissaa aasaanerani sulinngiffeqarnerup kingornanut utaqqisinneqartariaqartoq Naalakkersuisut sapaatip akunnerata siuliani tusagassiortunik katersortitsinermi oqaatigaat. Ammaasoqarnissaanullu qanoq amerlatigisut akiuussutissamik kapitikkusunnerat apeqqutaassalluni.

Tasiilami coronamut akiuussutissat siulliit maajimi apuunnissaat pilersaarutaavoq.