Islandip takornarianut akiuussutisserneqarsimasunut tamanut matut ammarai

Islandimut nunarsuarmit tamarmit tikeraarniartut corovirusimut akiuussuserneqarsimagunik sisamanngornermit tikissinnaalissapput.

Islandimi ministeriuneq, Katrín Jakobsdóttir taama nalunaaruteqarpoq.

Takornariat tikinnerminnit misissortinnissaat angerlarsimaannartinneqarnissaallu piumasaqaataanavianngilaq. Taakku Europami Nakorsaatinut Aqutsisoqarfimmit (EMA-mit) akuerineqarsimasumit akiuussuserneqarnissaminnut taamaallaat uppernarsaateqassapput.

Akiuussutissat ukunanngaanneersuupput Pfizer/BioNTech, Moderna, AstraZeneca og Johnson & Johnson. Taaneqartoq kingulleq marsip ulluisa aqqarnanni akuerineqarpoq.

AAMMA ATUARUK Islandimi coronamut akiuussussersimanermut uppernarsaat atuutilersoq

Islandip takornariaqarneq coronap ukiumi ataatsimi ilungersuatitsineratigut inuiaqatigiinnut angallannermullu matusisoqartareersoq pitsanngorsarniarpaa.

- Nunarsuarmi qaammatini kingullerni aqqaneq-marlunni pisoqartupilussuuvoq, tamat arriitsumik qularnaatsumillu ulluinnarnut nalinginnaasunut uteriartornissaat neriuutigaarput.

- Tamanna angalasoqarsinnaaneranut periarfissanik ammaaqqinnermik ilaqarpoq, tamanna kulturimut, niuernermut suliffeqarfinnullu pingaaruteqarpoq, Islandimi ministeriuneq oqarpoq.

Islandip europamiut akiuussuserneqarsimasut maannamut nunamut isersinnaatissimavai. Tamannalu maanna Schengep avataaneersunut aamma atuutilissasoq, ministeriuneq paasissutissiivoq. Tassani assersuutigalugu Tuluit Nunaanneersut USA-meersullu ilaapput.

Island coronamik nunarsuaq tamakkerlugu tunillaassuuttoqaleqqaarneranit siulliit ilaalluni killeqarfinnik ammaassaaq, Islandimilu coronamik tunillatsinnikuusimasunit katillugit 29-t toqusimasutut nalunaarsorsimapput.

Islandimut 2020-mi takornariartut 75 procentinik ikilisimapput.