Nunatsinniit Islandimut angalariaannanngortoqartoq
Islandimi puilasut kissartut, ikinngutit nalunngisallu tikinneqaqqissinnaalerput.
Islandip Nuummi generalkonsulia taama ilisimatitsivoq.
Kalaallit Nunaannit Islandimut angalasut tunillanneqarsimannginnermik tikinnermi uppernarsaateqartariaqanngitsut, tikinnermiluunniit misissortinnissamut ullunilu tallimani immikkoorsimaarnissamut piumasaqaatit taakkununnga februaarip ulluisa 24-annit atuutissanngitsut, nappaatit tunillaassuuttut pillugit immikkut ilisimasallit Islandimi aqutsisuata aalajangerpaa.
AAMMA ATUARUK Tusagassiuut: Nunatsinni inersimasut tamarmik inuiattut ullorsiortinnata akiuussuserneqarnissamik neqeroorfigineqassapput
Kalaallit Nunaanni covid-19-imik tunillanneqarsimasumik januaarip ulluisa 14-iannili siumuisoqarsimannginnera pissutaalluni tamanna aalajangerneqarpoq.
Nunatsinniilli Islandiliarniaraannni Islandimut tikinnginnermi nunami allami coronavirusimik ulluni kingullerni 14-ini tuniluuffiusumiissimannginnissaq piumasaqaataavoq.
Kalaallit Nunaanniilli Islandimut angalasut ulluni 14-ini suli mianersortarnissaat, nappaatit tunillaassuuttut pillugit immikkut ilisimasallit aqutsisuata kaammattuutigaa, soorlu aamma eqqiluisaarnissaq inuillu sanngiitsut qanillinaveersaarneqarnissaat aamma kaammattuutigineqartoq.
Islandimi inuit 6049-t covid-19-imik tunillanneqarsimasutut maannamut siumorneqarsimapput, 29-llu nappaat toqqutigisimallugu.
Nutarterneqarpoq:
Nunatta Islandillu akornanni toqqaannartumik timmisartuussineq nunatsinnut isernissamut inerteqquteqarneq pissutigalugu apriilip ulluisa 18-iata tungaanut matoqqatinneqarpoq.
Nunatsinnilli Islandimut toqqaannartumik angallasisoqarsinnaaleqqippat nunatsinnit angalasoq sumiiffimmut COVID-19-imik tunillaassuuffiusumut ullut 14-it sioqqullugit angalasimannginnissaa piumasaqaataassaaq.
