Tarrak Roskilde Festivalimi Suspektikkut tunuliaqutaralugit tusarnaartitsisoq: Misigisaq nuanneruloorpoq
Josef Tarrak-Petrussen Roskilde Festivalimi ataasinngormat unnukkut tusarnaartitseqqaalerami pissangavoq.
Danskit rappertartoqatigiit Suspekt tupaallatsitsilllutik tusarnaartitseqataasussat suli takkutinngillat. Josef Tarrak-Petrussen minuttit ingerlaneranni annilaangaleriartorpoq.
Tusarnaartitsivittaamut Gaia-mut tusarnaariartut qanoq amerlatiginersut igalaasaaqqakkut takusinnaavai.
Tusarnaariartut akornanni sungaartunik atisallit takunngitsoorneqarsinnaanngillat. Taakku nunatsinninngaanneerput.
Josef Tarrak-Petrussen atortorissaarutini piareersarpai. Akunneq affaq qaangiuppat tusarnaartitsissaaq.
Tusarnaartitsiviulli tusarnaartitsingajalerluni tunuanukarami Suspektikkut apuussimasut takuai.
Tusaamasat malillugit
Taanna ullumikkut 24-nik ukioqarpoq, 2016-lu erinaq Tupilak saqqummersikkamiulli nipilersornerup silarsuaanut anillakaappoq. Erinnami tassani danskit kalaallinut ammip qalipaataanik immikkoortitsinerat inuiattullu assigiinngisitsinerat kamaatigigini ersersippaa.
Ataasinngormalli unnukkut scenemut qaqilluni appimmat erinarlu taanna appimmagu inuiaat taakku marluk assigiinngilluinnartut imminnut ilaruttutullusooq ilipput erinnamik ataqatigiissuteqalerlutik.
- Qujamasunnarsuaarpoq. Inuppassuit takkuttut. Aamma qallunaajugaluarlutik sapiiiserlutik kalaallisut taasillattaarlutik kalaallisut erinarsoqataasunut assut tupigusuppunga, Josef Tarrak-Petrussen oqaluttuarpoq.
Nunatsinninngaanneersut atisaasa assinganik atisaqarluni maanna tusarnaartitsivoq. Aamma tusaamasat allt soorlu Jada, Mø, Tessa The Mind of 99-ilu ukioq manna Roskilde Festivalimi tusarnaartitseqqaarput.
Tusarnaartitsivimmi nuannisarrapput. Erinniaq Uummatima Suspektikkunnit erinnioqataaffigineqarpoq, taakkualu tusarnaartitsivimmut animmata, tusarnaariartut nuannallutik nilliapput.
- Saarfaarsuk nuanneq! Utoqqatserpunga oqaasipilukkama, kisianni nuanneqigami. Siornatigut Roskilde Festivalimut peqataanikuunngisaannarpunga. Inuppassuit ulikkaarluinnartumi najuuttut nuannisarnerat nuannaralugu suli eqqaasaqattaartuarpara, ilumut nuan! Tamakku tamarmik nuannerluinnaqqissaartumik pipput, Josef Tarrak-Petrussen oqarpoq.
Kalaallisut erinarsortoqarsinnaasoq
Josef Tarrak-Petrussenip tujuuluarani tusarnaaartitsinermini peermagu sakiaani kakiortugaq Kalak-mik allassimasoq takuneqarsinnaavoq.
Tusarnaartitsinernilu ullumi eqqarsaatigiguniuk misigisarpassuit eqqaasinnaavai. Immaqali pisoq ataaseq eqqaamanerpaassavaa.
- Immaqa "I den bedste mening" appikkakku eqqaamanerpaassavara. Erinnap naanerani erinarsuusakkama tamaavimmik erinarsorratilerput. Inupparpassuit. Taanna misigisaq nuanneruloorpoq.
Tupersuaq tusarnaartitsivik tusarnaariartunik ulikkaavippoq. Amerlangaarmata, tusarnaaariartut ilaat tupersuup silataaninngaanniit tusarnaartariaqarput.
Tusarnaartitsinerlu aatsaat aallarteqqammerpasikkaluarluni naavoq.
- Suna tamaat sukkangaarmat, soorlu 2 minuttiinnaq appisimaarluni misiginarpoq. 45 minuttini appisimaarpunga, kisianni soorlumi sinnattoq sukkasoorujussuaq. Appisimaarninni susoqarnersoq maannakkut eqqaallattaarujoorpara. Sukkanaarnaqaaq, Josef Tarrak-Petrussen oqarpoq, nangillunilu.
- Neriuppunga aamma nunatsinnut tunngatillugu sunniuteqarsinnaassasoq. Allat maannga appisimaariarsinnaassasut. Qaa. Nunatsinni nipilersortartut pikkoreruloortut amerlaruloortut nalunnginnakku allat aamma rappertartut maannga aggersinnaassasut neriuppunga. Aamma uanga kalaalliusinnaq rapperpunga, inuillu ilaapput, malinnaapput, nuannisaqataapput. Taava kalaallit allat maani appisimaarsinnaassasut neriuppunga.
- Illit Roskilde Festivalimi tusarnaartitseqqissamaarpit?
- Neriuppunga. Periarfissanissaguma toqqaannaq angissaanga. Ingasakkami nuannersuaarami, appeqquneqaqqissaguma toqqaannaq angissaanga.
Josef Tarrak-Petrussen illarpaluttoq oqarasuaakkut tusaaneqarsinnaavoq. Apersuinerullu naammassiartornerani ataatsimik suli oqarusuppoq.
- Nuummi tamaasa ilassigisigit.
