Tarnip pissusaanik ilinniagalik misilittagartooq ”Makittakkanik Tussaatinik” kalaallisuunik saqqummersitsisoq
Nuup Kangerlua augustimi seqinnarissumi qillarippoq, sissamilu iliveqarfitoqqap eqqaani psykologi Inuk L. Borup Bang naapippara, sullivimmi eqqaani sissami sivisuumik pisuttuartartoq.
Pinngortitap timimut tarnimullu sunniutai psykologitut traumeterapeutitullu sulinermini atorluartarpai, ukiunilu arlalinni piviusunngornikuunngitsumik takorluuisarsimavoq, massakkut piviusunngortumik: Tassalu imminut ikiornissamut ”Makittakkat Tussaatit”.
Inuk L. Borup Bangimi isumaqarpoq imminut ikiornissamut makittagaqarpassuaqartoq pitsaasunik, kisiannili kalaallisuut amigaataasimasut, atuisup nammineq oqaatsini atorlugit atorsinnaasaanik.
- Uannut pingaaruteqarpoq, uanga kalaaliullunga eqqarsartariaatsima makittakkani ilisarnarnissaa. Pinngortitamut qanittuuvugut taamaattumillu immikkuullarissumik takorluueriaaseqarluta, neriuutigaaralu kalaaleqatima makittakkat iluaqutigiumaaraat.
Kalaallit suliamut ilisimasallit nukittuumik suleqatigiinnerat
”Makittakkat Tusaatit” tassaapput makittakkat assiliartalersukkat 30-it, pisariaqartitsineq naapertorlugu makinneqarsinnaasut. Siunertaavoq oqimaaqatigiinnerulernissaq aamma misigissutsitigut imminut qaninnerulernissaq piffissani ajornartoorfiusuni.
- Atuisussatut siunertarineqartut tassaapput kalaallit, tassami Kalaallit Nunaanniippugut. Uanga kalaaliuvunga. Tamaattumillu uannut oqaatsikka atorlugit suliaqarnissara qanittuararsuuvoq, suliamut tunngasunik ilisimasallit kalaallit allat peqatigalugit.
Inuk L.-ip saqqummersitsisarfik Arctic Media eqqaavaa, aamma atuakkiortoq Sørine Steenholdt eqqumiitsuliortorlu Ivínguaq Stork Høegh eqqaavai, taakku makittakkat atuagaarniarfimmi Atuagkani Nuummiittumi pisiarineqarsinnaalernerannut iluaqutaasimammata. Neriunarpoq inuppassuit siunissami iluaqutigiumaaraat.
- Imaassinnaavoq eqqarsaatit oqimaattut atorivut, nakkaqalluta imaluunniit nukissaalatsilluta. Tamaalisoqarnerani makittakkat iluaqutaasinnaapput, kisimiikkaluarluniluunniit paasineqarsinnaalernissamut, nassuiaavoq.
Immap eqqissisitsisarnera
Malippalaaq tunuliaqutsiullugu Inuk L. Borup Bang ujaqqamut igippoq makittakkamillu imminut immikkoorutilimmik tigusilluni – sissarlu atuffassinermut tulluaqqissaarpoq.
- Takorloorpara ilummut anersaaruma, mallit nunamut tuttarnerisa timera salikkaat. Silammut anersaaqqikkuma, immap pisariaqartinngisakka tamaasa nassassagai. Iluaatsut tamaasa iperarusutakka, atuffappaanga seqinermullu isai uisorersarput.
Makittakkanit pissarsiat sissami pisuttuarnissamut naammanngippata, makittakkat atorlugit sungiusartoqarsinnaavoq, timip malugisinnaanissaa piumasaqaatituaalluni. Sunik pisoqarsinnaanera takorlooruminaassinnaasarmat, timikkut misilittaasoqarsinnaavoq.
- Timinni eqqissiviillioruit, taava assavit aappaa uummativit nalaanut inissillugu aappaalu naannut, taava assavit kissassusaat attuinerallu malugisinnaassavatit. Taamaaliornikkut eqqissiallattoqarsinnaavoq, ajornartoorfinnilu pissusissamisoornerusumik iliuuseqarsinnaalerluni.
Suliamut inuunermillu misilittagaqarnerup kinguneri
Inuk L. Borup Bang-ip imminut ikiornissamut makittagaliai inuunermini inuttut misilittagaqarnerup kingunerai – tassunga ilanngullugu suliamut tunngasunik misilittagaqarneq, assersuutigalugu meditationi aamma mindfulness.
Ukioqqortusiartornermini eqqarsaatigisarpaa, meeraanermini aallaarlutik toqqup qaavanut sialuit torarnerat, pinngortitamilu misigisarpassuit allat.
- Ulluinnarni inunnut tunngasunik suliaqaraluarlunga uanga aamma inuuvunga. Eqqissineq oqimaaqatigiinerlu pisariaqartittarpakka, tamannalu annertuumik pinngortitamiinnikkut angusarpara.
Pinngortitaq ungasippallaaleraangakku susoqartarpa?
- Taava paatsiveerusimaalertarpunga. Kalaallit amerlasuut tamanna ilisarnaatigigunarpaat, imaq isigisinnaanngikkaanni mattusimalersutut misiginartarmat.
