VIDEO Tarnikkut naalliuuteqarnermi saaffiginniffissaaleqisartut

- Pissutsit imaakkamik, peqqinnissaqarfimmut saaffiginnikkaluarluni ilaanikkut akissutigineqartarpoq A1 ulikkaaqqasoq ikioqqunerlu ajornarsinnaasarluni.

- Soorlu ernera nakorsiaraangat arlaleriarlunga taamatut oqarfigitittarpunga A1 ulikkaarpoq, inissaqanngilaq, angerlarniarallaat uffalu aana sakkortuumik nappaanni atoraa, Esekias Therkelsen Sugisami siulittaasoq KNR-imut oqarpoq.

Tarnikkut naalliuuteqarnermi saaffissaaleqinartarpoq.

Tarnimigut nappaateqartup Karen Geislerip 46-nik ukiullip aamma ilisimavaa, ikioqqunissaq ajornakusoornartartoq:

- Tassa taanna amigaataavoq inuit ajorsilluinnaraangata aatsaat ikiorneqartarnerat annernartupilussuuvoq. Imaaliallaannaq saaffissaqanngilagut qamuuna naalliuuteqarluta saaffiginniffissaaleqinartaqaaq, Karen Geisler KNR-imut oqarpoq.

Tarnikkullu nappaateqartut ajorsivallaannginnerini katsorsarneqartarnissaat, tarnimikkut nappaateqartut qanigisaasa peqatigiiffianit Sugisamit noqqaassutigineqarpoq.

- Soorlu pasitsaassaqaraanni, napparsimasumik ujartuilluni illoqarfimmi imaluunniit angerlarsimaffiinut paasiniaaffigalugit pisinnaaneq, suliaqarneq ingerlarneqarsinnaasalertuugaluarpat nunatsinni aamma iluaqutaasinnaassagaluarpoq, Esekias Therkelsen oqarpoq. 

Tarnimikkut nappaatilinnut immikkoortortaqarfimmut Nuummi tarnimikkut napparsimasut pinngitsaalisaasummik ukiumut unitsinneqartartut ukiut kingulliit amerliartorput. 2013-imi  uninngatinneqarsimasut katillugit 18-iusimapput,  2015-imilu 50-iusimallutik.