Tammaaneqartumut anaanaq: Issanngunerit eqqarsaaterpassuillu unnuaanerani sakkortunerpaasarput
Kirstine Berthelsenip angajoqqaat misigerusunngisaannagaat septembarip 19-ianni sianerfigineqarami misigaa.
Kalaallinit kingoqqisoq Kim David Berthelsen 29-inik ukiulik, Afrikap kitaani Kap Verdemi tammaaneqartoq, anaanaasoq danskit politiiviniit paasitinneqarpoq.
Ernini ujaarineqartoq paasitinneqaramili pasissutissanik allanik, danskit politiivilu ulloq manna tikillugu attavigineqaqqissimanngillat.
- Kap Verdemi politiit Danmarkimi politiinut paasissutissiiniartarnerat sivisuvoq. Politiit marluk SMS-ikkut attaveqatigaakka kisianni suli massakkumut paasissutissanik nutaanik pissarsiaqanngilagut, Kirstine Berthelsen oqarpoq.
Nunanut allanut ministereqarfik Københavnimilu politiit suliamik ilisimannillutik KNR-imut allakkatigut uppernarsarpaat, annerusumilli paasissutisssiinatik.
Kim David Berthelsenip tammaaneqartutut suli nalunaarutigineqannginnermini qaammat ataaseq sioqqullugu attaveqarunnaarpoq. Kirstine Berthelsenip ernini E-mailikkut oqarasuaatikkullu attaviginiarsimagaluarpaa, iluatsinnanguli.
- E-mailikkut telefonikkullu attaviginiasarigaluarpara. E-maili akineqanngilaq telofonilu iliinnarneqarluni sunaaffami imaannarmiittut, Kirstine Berthelsen oqarpoq.
Kirstine Berthelsenillu ernerata Kim David Berthelsenip ujaarineqartutut nalunaarutigineqareernerata kingorna, Cape Verdemi politiiniit ujaasinerup sumut killinneranik paasissutissanik pissarsineq ajornertik issanngunaraa, utaqqiinnartariaqarlunili oqaatigalugu.
- Ujaasineq qanoq ingerlava? Ujaasineq qaqugumut ingerlava? Issanngunartorujussuuvoq taamaammat, Kirstine Berthelsen oqarpoq.
Nunarsuaq tamaat angalallugu
Kap Verdemi ujaarineqartoq Kim David Berthelsen inuusuttuaraanerminiilli angalalluni skateboardertartunut qaqqamilu sikkilertartunut toqqaviliorlunilu aqqusinniorluni arlaleriarluni sulisarsimasoq Kirstine Berthelsenip oqaluttuaraa.
- Inuusuttuararsuullunili nunarsuup ilaani ungasissumi skatebaneliorlutillu betonilerisuni pilersitsisarput, Kirstine Berthelsen oqarpoq.
Kim David Berthelsenilu nunarsuarmi angalalluni sulisarmat umiarsuarmut allamut ikisimassappat attaveqarnerlu ajoruni Kirstine Berthelsenip tupiginngilaa.
Kim David Berthelsen ikinngutinilu Danmarkimiit februaarimili aallarput.
Ikinngutinilu marluullutik tingerlaataannalimmut ilaapput, tasssanilu paarlakaaallutik sulisarput, ilaatigut aqullutik. Kisianni ikinngutaasup sinereerluni paarlaannialernerminni makikkami Kim David Berthelsen periarfeerukkamiuk maqaasineqartutut nalunaarutigaa.
Neriunneq
Kirstine Berthelsenip Kap Verdemi politiiniit Danmarkimilu politiiniit sivitsortumi nutaaanik paasissutissarsinngikkaluarluni, neriunneq kisiat pigisariaqarlugu oqaluttuarpoq. Kim David Berthelsenillu anaana Kirstine Berthelsen ujaarineqalermat Facebook-ikkut ujaasilluni allagarsiivoq.
- Eqqarsaatikka amerlaqaat, ajunaarsimaguni taamaassimassooq. Umiatsiamut umiarsuarmulluunniit allamut ikisimaguni imaluunniit qanoq pisoqarsimappat taamaassimassaaq.
- Kissaatiginerpaavarali matukkut iseriasaassasoq, Kirstine Berthelsen oqarpoq.
Kirstine Berthelsenip ernini Kim David Berthelsen 500 kilometerisut ungasitsigisumi tammaaneqarluni ujaarineqarnera aliasuutigigaluarlugu anaanatut nukittunini tupigusuutigaa. Unnukkulli artornarnerpaasarpoq.
- Tupinnaannartumik nukittuvunga, unnuleraangalli ajornerpaasarpoq, nalorninerup nalaaniileraangama artorsartarpunga, neriuuteqartuaannarpungali nassaarineqassasoq, Kirstine Berthelsen oqarpoq.
Kap Verdemi politiit KNR-imiit attaviginiaraluarpagut sulili iluatsinnagu.
