QIMMIT NAPPAALASORINEQARTUT Tallimat toqusut

- Taama sunniukkiartuaarusaarnera soorunami ajorpoq. Immaqa februaarinngunnitsoq ikilereersimassapput, Siorapalummi kommunefogedi, Ilannguaq Hendriksen, oqarpoq.

Avanersuarmi Siorapalummi qimmit nappaalalersimasut, Avannaata Kommuniata tusagassiuutinut ippassaq nalunaarutigaa.

Kommunefogedi naapertorlugu nunaqarfimmi qimmiaraq toqqutigisussaasaminik napparsimasoq juulli sioqqullugu siumorneqarpoq. Qimmiaqqat sisamat, qimmerlu ataaseq napparsimallutik maannamut toqoreersimapput.

AAMMA ATUARUK Siorapalummi qimmit nappaalasut

AAMMA ATUARUK Savissivimmi qimmit nappaalanerat virusimik aallaaveqarsimavoq

- Inuit oqaatigisarpaat sanngiilliartortut taavalu aamma inuup alla qimmia noqarsimavoq. Tassa tusartakkakka malillugit ilai sivisuumik sanngeeqqaartarput ilaallu tassanngaannaq toqusarput.

Kalaallit Nunaanni qimmit tamarmik akiuussutissamik, Namminersorlutik Oqartussat akiligaannik, kapineqartarnissaat inatsisitigut 2016-imi peqqussutaalerpoq.

Kommunilli qimminut inatsit nutaaq Avanersuarmi piviusunngortikkuminaatsikkaa, Avannaata Kommuniata tusagassiuutinut nalunaarummi nassuerutigaa.

Siorapalummi qimmit 100-t missaanniipput ilaqutariillu tamarmik qimmeqarput isumalluutigeqisaminnik.

AAMMA ATUARUK Qimminut akiuussusersuisartutut 26-t allagartartaartut

- Soorunalimi qimmigut akiuussutissarserusuttaratsigit kommunip allaffianut apersuiuaannartaraluarpugut kapuutissanik qaqugu tikittoqassanersoq. Kisianni tikittoqarneq ajorami, Siorapalummi kommunefogedi, Ilannguaq Hendriksen, oqarpoq.

Avannaata Kommunia nappaalaneq akiorniarlugu Siorapalummut nappaammut akiuussutissanik nassartumik misissuiartortitsisoq, kommuni tusagassiuutinut allappoq.

Uumasunut Nakorsaqarfiup Siorapalummi qimmit suna nappaatigineraat maanna oqaatigisinnaanngikkallarpaat.