Tallimariarlutik kalaaliminertortalissapput
![](/sites/default/files/styles/image_934x467/public/article_images/kalaallit_illuat_kaffe.jpg?itok=G5ttay2v)
Kalaallit peqqissartut angerlarsimaffianni Brønshøjimiittumi nerisassarsiutissatut missingersuutaasunit ukiumut 1 million koruuniusunit 10 procentit kalaaliminersiutissatut illuartinneqartarput. Tassalu 100.000 koruunit. Taakku sapaatip akunneranut ataasiarluni kalaaliminertortarnissamut naammapput.
Inatsisartut 400.000 koruuninik tapiinissamik akuersaassappata, tamanna kalaallinut Danmarkimi uninngasunut pitsaasumik sunniuteqarsinnaassasoq, Kalaallit peqqissartut angerlarsimaffianni aqutsisuusup Stine Hansenip oqaatigaa.
- Taamatut pisoqassappat Kalaallit Illuanni kalaaliminertortarneq sapaatip akunneranut tallimariarluni pisalissagaluarpoq, Stine Hansen KNR.gl-imut oqarpoq.
Uninngasulli naatsorsuutigissanngilaat aningaasanik annerusunik tapiisoqarneratigut, kalaalimerngit kusanasaakkat sassaalliutigineqartalernisut.
- Kalaalimerngit nalinginnaasumik igaat kalaallit peqqissartut angerlarsimaffianni sassaalliutigineqartarput, assersuutigalugu puisi, tuttut umimmaallu suaasalerlugit, Stine Hansen oqarpoq.
Sassaalliutigineqartut saniatigut, kalaalimerngit panertut sassaalliutigineqartarput, taakkualu saniatigut nalliuttuni tuttut, umimmaat savallu siatat sassaaliutigineqartarput.
Siunnersuut inaarutaasumik aningaasaqarnermut ataatsimiititaliap 2012-imut akuerissappagu, siunnersuut 1013-imiit atuutilissaaq. Ilaqutariinnermut peqqissutsimullu ataatsimiititaliaq isumaqatigiissoq taama inassuteqarpoq.
Siunnersuut Doris Jakobsenip Siumumeersup saqqummiussaraa, siullermik 200.000 koruuninik aningaasartalerneqartussatut siunnersuutaasoq maanna 400.000 koruuninik aningaasartaqartussatut inassutigineqarpoq.