Takunnittoq: Tupaqaanga

Kristina Olsenip, Qaqortumi najugaqartup politiit, qatserisartut ambulancellu tusaaleramigit isumaqaqqaaraluarpoq, ikuallattoqartoq.

- Ikuallattoqarsoralugu tupattorujussuuvunga. Taava illu sisoorussaasimasoq takulerarpara. Eqqarsaqqaarpunga illup iluani inoqarnersoq annilaartorujussuuvunga inunnik ikiortariaqalersoqarsoralugu, Kristina Olsen KNR-imut oqarpoq.

Politiit Qaqortumi nalunaarput inunnik ajoqusertoqanngitsoq.

Aputip sisoornissaa siumut naatsorsoruminaattarpoq silap qanoq ilinera apeqqutaasinnaasorujussuulluni, Misissueqqaarnerni Asiaq-mi ingeniøri Dorthe Petersen oqarpoq.

- Ataatsimimulli isigalugu oqartoqarsinaavoq, aputeqarpat taassumalu qaanut siallerpat, taava aput oqimaappallaalersinaavoq, piffissallu ingerlanerani sisoorluni. Aammali qaqqat pineqartut qanoq sivingatigineri apeqqutaalluinnarput, Dorthe Petersen KNR-imut nassuiaavoq.

Apulli sisooraangami ulorianarsinnaasarpoq, qaqqap sivingassusia, qaqqap apummik sisoorfiusup portussusisa, aputillu sisoortup sukkassusia apeqqutallutik.

- Aput sisoortoq annertoorujussuusinnaavoq. Aamma sisoornera sukkasoorujussuusinnaavoq. Tassalu apummik sisoortoqatillugu ilaanni arpalluni qimaanissaq angumerineqarsinnaaneq ajorpoq, Dorthe Petersen taama oqarpoq.

Aputip sisoorfiata eqqaani najugallit tamarmik qimagutsinneqarput maannamullu Sømandshjemimut Sulisartullu Højskoleannut inissinneqarallarlutik.

Politiit aarleqqutigaat aputip sisooqqissinnaanera.