Takornariat: Naammagittaalliutissaqanngilagut, takusarput kusanarluinnarpoq!
Umiarsuit takornariartaassuit Nuup umiarsualivianut talikkaangata illoqarfiup ilua inuaqerpalaarnerulerssarpoq, soorluttaaq nipimi aallarniutigisatsinni tusaasinnaagissi Nuummi umiarsualiviup takornariat paasiniaavianni takornariaq amerikamiu saaffiginnippaluttoq.
Ukioq mannami umiarsuit takornariartaatit tikittut ukioq manna aatsaat taamak amerlatigisut tikipput, katillugimmi 480-t umiarsuit tikittussatut naatsorsuutigineqarpoq, tassa siornamut naleqqiullugu 100-t missaannik amerlanerusut ukioq manna tikipput.
Nunatsinnilu sila unerisimanngittaqattaaraluaqisoq takornariat naammagittaalliunngillat:
- Sila nillasukkaluartoq kavaajalersoraluarlungalu uanga ajoriffissaqartinngilara. Ajunngilluinnarpoq sialoqanngilaq pujoraluarpoq ajorinngilluinnarparali, amerikamiu arnaq Brenda Brock KNR-mut oqarpoq.
Taassumami nunarput takorusuttuaannarsimavaa:
- Kalaallit Nunaanniissimanngisaannarpunga, takorusuttuaannarsimavaralu. Suna tamarmi kusanarluinnaqqissaarpoq, iluliarsuit takuakka, Kalaallit Nunaallu tummarsinnaagakku tikissinnaagakkulu nuannaarutigeqaara, taanna oqarpoq nangipporlu:
- Naammagittaaliutissaqanngilanga, kikkut tamarmik pitsaarpaseqaat tamannalu tunissutaavoq ajunngilluinnartoq kusanarluinnartorlu, taanna erseqqissaavoq.
KNR-p aamma aappariit amerikamiut naapippai, taakkulu nunarsuarmi angalaarput:
- Kalaallit Nunaat takussallugu pissanganartissimavara, nuliaralu nunarsuarmi angalaarpugut Kalaallit Nunaallu takorusutatsinnut ilaavoq, 72-nik ukiulik Yasar Ozcan KNR-mut oqarpoq.
- Nuummut tikinnerput nuanneqaaq pisuttualaarsinnaanerpummi iluarpoq Nuummi illoqarfiup ilusaa takornarialaarsinnaagatsigu nuannaraarput aammalu illoqarfiup qalipaatigilluinnarnera takullugu alutornaqaaq, 72-nik ukiulik siulianilu oqaaseqartitatta nulia Gulieri Ozcan KNR-mut oqarpoq.
Taamatut umiarsuit takornariartaatit nunatsinnut tikitsillugit inuppassuit piserusussusillit ataatsikkoorlutik tikerartarput.
Nuummili sissiukkamukarnitta nalaani, umiarsualivimmi initoqisumi inissaqarluaraluartumilu nerrivilerluni tuniniaasoq ataasiinnaq kisimi takussaavoq:
- Takornariat paaserusuttaqaat kalaallit sanalugaat suminngaanniit aallaaveqarnersut, akiili tusaraangamikkit akisunaartarpaat, Ivinnguaq Andersen Tupilak Travelimeersoq oqarpoq.
Taannattaaq isumaqarpoq, umiarsualivimmi nerriviit tuniniaasut amerlanerusuuppata nuannernerusimassagaluartoq:
- Umiarsuarmut ilaallutik takornariat kulturitsinnik tamatumalu aallaavianik soqutiginnittaqaat. Taamaattumik nerriviit amerlanerusinnaasuuppata nuannissagaluarpoq, taanna oqarpoq.
