Takornariat amerlisarnissaannut nutaamik periusissiortoqartoq
Nunatta Islandimut Svalbardimullu naleqqiullugu arlalitsigut unammillersinnaassuseqannginnera siusinnerusukkut nalunaarusiarineqartumi allaaserineqarpoq, tamannalu ilaatigut umiarsuarnut takornariartaatinut akitsuutit qaffasippallaarnerinik pissuteqarpoq. Akitsuutilli taakku maanna appartinneqarsimapput.
Tamatuma saniatigut sissiukkanut tunngasut naammaginanngitsutut aamma allaaserineqarput, aningaasaliinerillu annertugisassaanngitsut atorlugit tamakku malunnaatilimmik pitsanngorsarneqarsinnaasut, umiarsuarnullu takornartaatinut ilaasut amerlanerusut nunamut ikaartalersinnaasut, periusissami allaaserineqarpoq.
Aamma atuaruk Issittumi takornariartitsineq siuariartorfiujuarsinnartoq
Silaannakkut angallanneq, mittarfiit eqqarsaatiginerullugit, aamma aaqqiissuteqarfigisassani qitiutinneqarpoq.
Aningaasartuummi, taamatullu aamma billetsit, nunarsuarmi ingerlaarfinnut assingusunut naleqqiullugit ullumikkut qaffasippallaarujussuarput. Nuummi Ilulissanilu mittarfiit tallilerneqarnerisigut illoqarfinni taakkunani aningaasartuutaasartut 30 procentit tikillugit sipaaruteqarfigineqarsinnaasut periusissiami allaaserineqarpoq.
Nunatsinnili assartuussinerup qulakkeerneqarnissaa aamma pingaarpoq, takornariat taamaasillutik Nunatsinni angalasinnaaniassammata.
Namminersortut inuussutissarsiuummi aningaasalersuinissaminnut kajumissuseqalersinnissaat pisariaqartoq periusissiami aamma tikkuarneqarpoq. Ullumikkummi inuilaami akunnittarfinnik, sukisaarsaatigalugu aalisartut aallaaniartullu tammaarsimaarfissaannik aammalu qaqqani sisorarnissamut atortulersuutinik pisariaqartitsisoqarpoq. Naatsumik oqaatigalugu, Nunatsinni misigisassaqartitsinissamut aammalu takornarianik tikilluaqqusinissamut aningaasalersuinissaq pisariaqartinneqarpoq.
Kiisalu aamma sumiiffiit akuersissuteqarfiusut pillugit inatsit pimoorullugu piviusunngortinneqartariaqarpoq, aningaasalersuisartut takornarianik kuunnut kapisileqarfiusunut assigisaanulluunniit kisermaassillutik takornariartitsisinnaanngortillugit.