Inuussutissarsiutit

Issittumi takornariartitsineq siuariartorfiujuarsinnartoq

Issittumi takornariaqarneq ukiuni makkunani siuariartupiloorpoq. 2015-imut kisitsisit nutaat taama takutitsisut, Berlingskep tamanna allaaseraa.

Allattoq Karsten Sommer

februaarip 12-at 2016 07:56

Nutserisoq Simon Uldum -

Pingaartumik Island, kissartunik aammalu tissaluttunik puilasulik, kuussualik iigartartunillu sermilik ukiut tamaasa takornariaqarnikkut angusaqarfiulluartarpoq.

Nunanit allaneersut 1,3 millionit Island siorna 2015-imi takornariarfigaat, tamannalu ukiup siulianut naleqqiullugu 30 procentinik siuariarneruvoq.

Ukioq 2000-imi Islandimut takornariartut 300.000-iusimapput, 2015-imilu 1 millioninik amerleriaateqarnerisigit Island nunarsuarmi nunat takornariarfiunerpaasut tallimat ilagilerpaat, Berlingske taama allaaserisaqarpoq.

Aamma atuaruk Kisitsisit nutaat takornariaqarnerup iluani siuariartornermik takutitsisut

Nunatsinnut siorna takornariartunut sanilliutissagaanni, Nunatsinnut takornariat 10 procentit missaannik, tassalu 68.000-inik, amerleriaateqarput. Aamma Norgep avannaanut takornariartartut amerleriangaatsiarsimapput.

Norgep avannaani takornariaqarnermik inuussutissarsiuteqarnermi sulisut 2014-imi 16.000-init amerlanerupput. Norgep issittortaani takornariaqarnermik inuussutissarsiuteqarnermi sulisut aalisakkanik suliffissuaqarnermi sulisut amerlaqatingigajappaat.

Norgep avannaanut takornariartartut arsarnerit takorusullugit tikittarput. Takornariat amerlassusaannut iluanaarutaasarnerinullu tunngatillugu, ukiuunerani takornariartitsineq aasaanerani takornariartitsinermit angusaqarfiunerusarpoq.

Nunatsinnili Islandimilu suli aasaanerani takornariaqarnerpaasartoq, Berlingske allappoq.

Nutaarsiassami kukkunermik nassaarsimaguit uunga allaffigineqarsinnaavugut.