Takornariartaat immikkut nakkutigisaasoq Nuummut tikissaaq
![](/sites/default/files/styles/image_934x467/public/article_images/caribbean_princess_gary_bembridge_flickr.jpg?itok=I583QK0r)
Umiarsuit takornariartaatit aasaq manna nunatsinniittussat annerpaartaasa ilaannik piginnittoq - Carnival Corporation & PLC USA-p umiarsualiviinut tulakkaagami nakkutigineqartussaatitaagallarpoq.
Miami Herald taama allappoq.
Nakkutigineqartussaatitanera takornariartitsinermi umiarsuaatileqatigiiffiup ukiuni arfineq pingasuni imavissuarmut uuliamik kuutsitsisarsimanera amerikamiullu oqartussaasuinut tamanna pillugu salluliortarsimanera pissutigalugit isumaqatigiissutigisaanut ilaavoq. Umiarsuaatileqatigiiffillu tassunga atatillugu 263 millionit koruuninik akiligassinneqarsimavoq.
AAMMA ATUARUK Umiarsuit takornariartaatit Nuummi ikuallaaviup ukiumi ataatsimi ikuallaaneratut mingutsitsitigisartut
Carnivalip umiarsuaataasa ukiut marluk matuma siorna isumaqatigiissummik, tassa piffissamik misilinneqarfiusumik, unioqqutitsisimammat, amerikamiut eqqartuussisuata Carnivalip umiarsuaatai amerikamiut umiarsualiviinut tulannissaat inerteqqutigilerniarlugu sapaatip akunnerata siuliani sioorasaarutigaa.
Miami Heraldsip paasissutissaatai naapertorlugit umiarsuaatileqatigiiffiup taassumalu ataani piginneqatigiiffiit nakkutigineqartumik alakkarneqarnissaminnut nalunaarsuinerit peqquserluttumik allanngortitertarpaat, eqqagassat plastikkiusut imaanut igittarpaat imikoorummillu Alaskami Glacier Bay Nationalparkip eqqaani inerteqqutaasumik kuutsitsisarlutik.
Eqqartuussivimmi suliami unnerluussisussaatitaasup suliffeqarfik USA-p sinerissami nakkutilliisuinut pissutsit isumaqatigiissutigineqarsimasut allanngortinniarsarisimagai oqaatigaa. Suliffeqarfiup suliami unnerluussutaasut eqqortuunerarpai.
AAMMA ATUARUK RAL sejler på HFO herhjemme - men ikke andre steder
Naallu umiarsuup takornariartaatip uuliamik imikoorummillu aniatitsinnginnissamut malittarisassat eqquutsissagaluarai umiarsuup Nunatsinnut tikeraarnermini kvælstoffi Nuummi eqqaavissuarmi ukiumut aniatinneqartartup pingasoriaataa aniatissagaa, danskit avatangiisit pillugit suliniaqatigiiffianit, Det Økologiske Rådimit, Kåre Press Kristensen oqarpoq.
Taassumalu Caribbean Princes ikummatissamik kinertumik atuisarnerarpaa umiarsuarlu ikumatissamik 3.300 kubikmeterimik imaqarsinnaanerarlugu.
- Takornariartaatip ulluni quliniit aqqaneq-marlunniluunnut maaniinnerani silaannamut mingutsitsissutinik NOX-inik, kvælstoffinik, paamillu Nuummi ikuallaavimmi ukiumi ataatsimi mingutsitsissutaasartutut mingutsitsisarpoq, taamaammat aarlerinangaatsiarpoq, Kåre Press Kristensen knr.gl-imut siorna aasakkut oqarpoq.