Takornariartaat alla nunatsinni kangerlummit kalillugu anillatsittariaqarsimasoq

Franskit ilaasartaataat Polarfront Tunumiittumi Fønfjordimi motoriaqqasoq, Islandip sinerissamik nakkutilliissutaata sapaatip akunnerani kingullermi ikiortariaqarsimavaa.

Allattoq Thor Bill

septembarip 26-at 2023 15:08

Nutserisoq Najâraq Egede

Tunumi takornariartaat alla Ocean Explorer Alpefjordenip imaani naqqanneqqasoq sapaatip akunnerata siuliani nusullugu kaanngartinneqarpoq maannalu akimarngit ilaasartaataat alla aamma ikiortariaqalersimalluni.

Polarfront Fønfjordimiitilluni Ittoqqortoormiit qanitaaniittumiitilluni ikiortariaqalerluni sapaatip akunnera kingulleq kalerrisaarivoq. Islandillu sinerissamik nakkutilliissutaata akivaa.

Taama Islandimiut sinerissamik nakkutilliisoqarfia Facebookimi quppernerminni allapput.

Polarfront siornatigut silasiortut umiarsuarisimavaat Norgemiut pigisaat. Umiarsuaq 2018-mi allanngortiterneqarpoq, akimarngit ilaasartaataattut inunnik 12-inik ilaasoqarsinnaasutut qulinillu inuttaqarsinnaasutut suliarineqarluni. Umiarsuaq naammassineqarami issittup imartaani immikkuullarissunik misigisaqarniartunut umiartortitsisartutut aallartippoq.

Islandip sinerissamik nakkutilliissutaa Thor Fønfjordenimukarluni pingasunngormat aallarpoq, ullullu marluk ingerlaareerluni franskit ilaasartaataat tikillugu. Ilaasartaat kisarsimaarluni ikiortissaminik utaqqivoq.

Polarfront kalusiunneqarpoq, ippassarlu ataasinngornermi angallatit Islandimi Reykjavikimut ajoratik apuupput.

Issittumi Sakkutooqarfiup KNR-imut uppernarsarpaa, pisoq nammineq aamma alapernaarsukkaminnut ilaasimasoq, pinartoqarsimanngitsorlu. Issittumi Sakkutooqarfiup ilisimatitsissutigaa, Polarfrontip ilaasui Ittoqqortuuliaanneqarsimasut tassanngaanniit timmisartuunneqarlutik angerlassammata.

Aamma atuarukTakornariartaatinut maleruaqqusat sukannernerulernissaannik oqarneq politikerit arlallit taperseraat

Takornariartaat Ocean Explorer Ittoqqortoormiit avannaatungaani Alpefjordikkoortilluni sapaatip akunnerata siuliani imaanut naqqannilluni ikiortariaqalersoq oqallissutaanikooqaaq. Allaat nunatsinni politikerit arlallit takornariartaatit tikittartut sukannernerusunik maleruagassaqalertariaqartut piumasaraat, nutaanillu inatsisilioqqusillutik.

Avatangiisinut Naalakkersuisoq Kalistat Lund (IA), neriorsuinikuuvoq, kangerluit piniariartarfiillu sorliit siunissami takornariarfigineqassannginnersut ilaatigut misissorneqassasoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.