Takornariartaassuaq Alpefjordimi ikkarlittoq
Takornariartaassuaq Ocean Explorer Tunumi Alpefjordimi Mestersvigip eqqaani nunami allanngutsaaliukkap ungasinngisaaniittumi ikkarlippoq.
Kalaallit Nunaanni Politiit pigaartuisa pisortaat, Ole Hald, taama oqarpoq:
- Takornariartaassuaq 206-inik issimasulik Ittoqqortoormiit avannaatungaani kangerlummi Alpefjordimi ikkarlissimasoq Issittumi Sakkutooqarfiup ataasinngornermi ualikkut sisamanut tanneq marlunngortoq kalerrippaatigut, taanna oqarpoq.
Takornariartaassuarmili ilaasunik qujanartumik ajoqusertoqarsimanngilaq – aamma umiarsuaq.
Taamammat takornariartaassuup ingerlaqqissinnaalernissaanut ulikkiartornissaa utaqqimaaginnartariaqarpaat. Marlunngornermi ullaakkut qulit missaanni ulikkiartussangatinneqarpoq.
Umiarsuaq alapernaarsuut ullorpaalunni apuunniartussaassasoq
Takornariartaassuulli ulikkiartornerani ingerlaqqissinnaanissaa qularigitsik, Issittumi Sakkutooqarfiup tusagassiinermi akisussaasua Camilla Schouw Broholm oqarpoq.
- Massakkorpiaq unerippoq, silali allanngoriataapiloorsinnaasarmat naatsorsuuteqarusuppallaanngilagut, taanna oqarpoq.
Taamaammat Issittumi Sakkutooqarfiup umiarsuaa alapernaarsuut, Knud Rasmussen, takornariartaassuarmut Alpefjordimi ikkarleqqasumut annaassiniariartorluni aallarsimalereerpoq.
Umiarsuaq alapernaarsuut taanna kilometerit hunnorujulikuutaat missaannik ungasitsisumiittukkut massakkorpiaq Ikerasassuarkoorpoq.
- Tassa ullorpaalunni apuunniartussaassaaq. Silali allanngoriartaarsinnaammat, takornariartaassuup ulikkiartornerani ingerlaqqissinnaalernissaa qularnarmat tassanilu ilaasunik ajornartorsiortoqarpat taakku qimagussorsinnaajumallugit annaassiniariartorluni aallarpoq, Camilla Schouw Broholm oqarpoq.
