VIDEO Takornarianik sullisserusuttoq utaqqititaasoq
![](/sites/default/files/styles/image_934x467/public/oembed_thumbnails/2022-12/uScHlZC7aWIhBBn8_LxGSMT0_LuOwF8fXWcpsf-k1GM.jpg?itok=TUpV77vk)
Piniartutut inuussutissarsiuteqarneq imminut akilersinnaajuaannanngilaq. Taamaammat Kulusummiu, Pele Maratse, aasaq junimi Poca 570-imik angallateerartaarami piniartuunermi saniatigut takornarianik angallassisinnaajumalluni Imarsiornermut Qullersaqarfimmut, Danamarkimi Københavnimiittumut akuersissummik piniarniarluni qinnuteqarpoq.
Pele Maratse qinnuteqarmalli qaammatit qulingiluanngoreersut, akissutisinissaminut suli utaqqivoq.
Kulusummi pinngortitarsuaq kusatseruttorpoq takonnarissallu tikillattaalereerlutik. Pele Maratseli isiginnaaginnartariaqarpoq, tassami takornarissanik angallassinissamut akuersissummik peqanngilaq.
- Allatut ajornartumik piniarnerinnarmik inuussutissarsiuteqartutut ingerlaqqittariaqartarougut. Tamannali imminut akilersinnaanngilaq, Pele Maratse KNR-imut oqarpoq.
Qinnuteqarniartarneq ajornakusoortoq
Piniartup Kulusummiup piniartutut inuussutissarsiuteqarnermi saniatigut aningaasarsiorusukkaluartup Imarsiornermut Qullersaqarfimmut qinnuteqarniarneq ajornakusoorpallaarsoraa.
- Akuersissummik peqarnani isiginnaartoorusaaginnarluni imminut akilersinnaanngitsutut nalilersinnaavara, Pele maratse oqarpoq.
Takornariaqarneq Naalakkersuisunit sukarsuit sisamaattut oqariartuutigineqarpoq. Tamannali Kulusummiup naapertuussorinngilaa.
Imarsiornermut Aqutsisoqarffimmi misissuisartut pisartaata suliaq pineqartoq oqaaseqarfigerusunngilaa.
- Paasissutissat amerlanerusut pisariaqartikkakkit suliaq pineqartoq ilisimasaqarfiginngilara. Sullitattali arriippallaarsorigunitigut ingerlaannaq aataveqarfigisariaqarpaatigut, Martin John KNR-imut oqarpoq.
Qanoruup ilanngutassiaa takuuk.