Ataatsimiititaliami ilaasortat: Takornarialerisunut ikiorsiissutit qineqqusaarnerpalaarpoq

Kujataani takornarialerinermik inuussutissarsiortut millionilikkaanik ikiorserneqarsinnaalernerat qineqqusaarnerusoq, Naleraq Siumullu isumaqarput.

Allattoq Andreas Wille, Kim Hinrichsen

januaarip 08-at 2025 07:30

Kujataani siorna januaarimit septembarip qaammataanut sikorsuaqarsimaqaaq. Tamanna takornarialerisunut kingunerluppoq.

Taakkuami sikorsuaqarnerata malitsigisaanik takornariartitsinermik inuussutissarsiorsinnaanerat piffissami tassani ajornakusoormat, Naalakkersuisut ikiorseerusullutik Inatsisartut aningaasaqarnermut akileraartarnermullu ataatsimiitsitaliaannut qinnuteqarput.

Qinnuteqaat amerlanerussutilinnit akuerineqarpoq. Aningaasanut 2024-mut inatsimmi 10 millionininik immikkut aningaasaliisoqarpoq.

SULIAQ NAATSUMIK

Nunatta kujataani takornarialerisinut ikiorsiissuteqartoqassasoq, inuussutissarsiornermut, niuernermullu naalakkersuisup, Naaja Nathanielsenip (IA) 2024-mi juulimi neriorsuutigaa.

Naaja Nathanielsen Inatsisartut Aningaasaqarnermut Akileraartarnermullu ataatsimiititaliaanut siullerpaamik oktobarimi qinnuteqaateqarpoq.

Naalakkersuisulli itigartinneqarput.

Ataatsimiititaliami ilaasortat arlallit naalakkersuisumit tassannga qinnuteqaat tukannerarpaat.

Tamatumalu saniatigut ataatsimiititaliap siulittaasuata, Peter Olsenip suliamut tassunga tunngatillugu isumaqatigiinniarnerit ataatsimiititaliap isertuussamik ataatsimiinneranneersut tunngaviginerarmagit atuuffimminit tunuarnissaa kissaatigaat. Taannali kinguneratigut pisortatigoortumik utoqqatsissuteqarpoq.

Ataatsimiititaliami ilaasortat arlallit suliaq naammassisutut isigalugu kingorna oqaatigaat.

Takornariartitsisunulli aningaasanik maanna nassaartoqarpoq.

Allisiguk

Naalakkersuisooqataasut Siumukkut, ataatsimiitsitaliami marlunnik ilaasortaatitaqarput. Taakkua aappaata akuersisimanerlutik KNR-imut uppernarsarusunngilaa. Suliarli suliarilluagaanngitsutut nalilerpaa.

- Tukattortaqalaartutut oqaatigisinnaavara, Kuno Fencker oqarpoq.

Ikiorsiissutit annerusumik pisariaqanngitsut

Ataatsimiitsitaliami siulittaasup tulliata, Naleqqallu siulittaasuata, Pele Brobergip, Naalakkersuisut qinnuteqaataat iluarinngilaa.

- Uagut akuerseqataanngilagut. Iluareqqusaarnertut qineqqusaarnertut inissillugu, taanna oqarpoq, nangillunilu:

- Takornarialerisut allatigut aningaasarsiornikuullutik matunikuunngillat suli ingerlapput, Naalakkersuisut qinnuteqaatiminni taama allapput. Allatut taallugu ikiorsiissutit taava annerusumik pisariaqartutut nalilerneqarsinnaanngillat, Pele Broberg oqarpoq.

Aamma atuarukIkiorseqqusunut itigartitsineq IA-p Siumullu akornanni isumaqatigiinngissutaasoq

Siumumeersup Kuno Fenckerip takornarialerisut ilaat ikiorneqarnissamik pisariaqartitseqisut arajutsisimagu oqarpoq. Ikiorsiinerli aamma qineqqussaarnertaqartutut nalilerpaa.

- Takulaarsinnaagaluarlugu arlaatigut qineqqusaarutitaqartoq kisianni takusinnaavara aamma pisariaqartitsivissortoqartoq, Kuno Fencker oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.