Takornarialerisoq pisortaajunnaartoq
Allaffik imaqulatsikujuppoq qimanneqarnissaminullu piareersimarpasilluni.
Anders Stenbakken Visit Greenlandimi ukiuni qulini pisortaareerluni ataasinngormat naggataarluni sulivoq.
- Nuannareqaara. Visit Greenlandimi suleqatigiunnaalikkakka aamma takornarialerineq nuannareqaakka. Ukiunimi makkunani pisorpassuaqarpoq, Visit Greenlandimi pisortaajunnaalersoq Anders Stenbakken taama oqarpoq.
Kukkussanngilagut oqarutta Anders Stenbakken ukiorpaalukasinni takornarialerinermik suliaqarmat,
tassami katillugit ukiuni 17-ini takornarialerivoq.
Maanna pisortaajunnaarfigilikkani Visit Greenland sioqqullugu Tunumi Destination East Greenlandimi sulivoq. Taamaattumillu takornariaqarnermik qanimut malinnaareerluni ineriartorneq iluarisimaarpaa.
- Takornarialerinermik suliaqartut suliaminnik ineriartortitsipput. Atuarnerup nalaani, tassa upernaakkut ukiakkullu takornariat tikittartut siornartigorninngaanniit amerlanerulernikuupput. Taamaattumik Kalaallit Nunaanni ineriartorneq pitsaaqaaq, Stenbakken oqarpoq.
AAMMA ATUARUK Visit Greenlandimi pisortaaneq KNI-mi pisortanngortoq
Mittarfiit nutaat iluaqutaassapput
Takornariat nunatta aningaasaqarneranut tapertaalluartussatut politikerininnganniit eqqaaneqartarput.
Takornariaqarneq maanna siumukaartoq suli iluatsinnerusumik aningasarsiorfiunerulissappat
periarfissat nutaat atorluarneqarnissaat pisortaajunnaalersup neriuutigaa.
- Mittarfiliorniarnerit piviusunngortinneqartariaqartut isumaqarpunga, pissutigalugu qaammat juli takornariaqarfiusangaarmat ineriartorfiujunnaarnikuuvoq akunnittarfiillu ulikkaartarlutik. Taamaammat takornariaqarneq aningaasarsiorfigissagutsigu aningaasaliisariaqarpugut, Anders Stenbakken oqarpoq.
Anders takornarialerinerup silarsuaa qimallugu KNI A/S-imi ussaassarinermut pisortanngussaaq.
- Qilanaaqaanga, unammillernarnissaa pissanganarnissaalu ilimagaara. Nutaarluinnarmi aallartilerpoq, Anders Stenbakken oqarpoq.
AAMMA ATUARUK Visit Greenland Takornariaqarnermut Siunnersuisoqatigiinni pitsaanerpaanut akuusoq
Takornariaqarnerullu iluani misilittagaqarluartoq naggataatigut apererusunnarpoq, nunatsinniinnikuunngisaannartuuguni takornariarusullunilu, taava sumunngarusussagaluarpamita. Toqqagassanilu nalornisiginngilaa.
- Ullumikkut kinaanera aallavigissagukku maaniinnikuunngisaannarsimasuugumalu, taava Tunuliassagaluarpunga. Tassami Tunu pikkunartorsuuvoq innuttaalu kissalaartuupput inussiarnersuullutillu, Anders Stenbakken oqarpoq.
Anders Stenbakken aggustip aallaqqaataani KNI A/S-imi ussaassarinermut pisortanngussaaq.