Taxartitsisoq tupaqqasoq: Taassuma dronningip aporneqarnera qanimut takuaa
Kunngikkut Nuummut sisamanngornermi ullaap tungaani tikipput, inuppassuillu tikilluaqqusiartorput.
Dronning tikinnerminnit akunnerup ataatsip missaata qaangiunnerani Nuutoqqami inuppassuit akornanni inunnik ilassinnilluni ingerlaarnermini angummit utoqqarmit el-scooterertumit aporneqarpoq.
Angutinnguaq Leibhardt apuinermik qanimut takunnittut ilagaat. Taanna illoqarfiit pingaarnersaanni ulluinnarni taxartartuuvoq, taassumalu dronning aportinnissaanut sekundini ingerlasuni ilassivaa.
- Mary inuuatigeriarakku ilasserusunnarami assut ingerlaarusaartugut taamaalluni angugaminga kutaaraminga tassami kutaarakku ilassigatta taava ingerlaleruttortoq oqarfigigakku ’februari fem’ taamatut oqaannarlunga qiviariarluni qujanerarami qungujulluni ingerlaleruttortoq oqarfigeqqikkakku uanga aamma februari femmiunerarlunga taava qiviaqqikkami assorujuk qungujukkami taava tunginnut saakkami qanoq pinerpoq oqarniamisaaleruttortoq tassa tassani aporteriataarpoq, Angutinnguaq Leibhardt KNR-imut oqarpoq.
Naalakkersuisut siulittaasuata, Múte B. Egede (IA) dronning apuinerup kingorna ajoqusinngitsoq tiguaa.
Eqqissisimaniartoq
Taxartartulli dronningip qisuariarnera takusinnaavaa:
- Immaqa oqarluaannaraanni qaninnerpaavaraluunniit aportittoq isigigakku, aporsisoq iluamik qiviannginnakku aallaqqaammut Mary isiginarnermik aamma tupannarlunilu takusinnaallugulu qanoq annerpasitsigisoq, isai ingerlaannaq immakkamik, annernarunartumik aporamiuk. Ingerlaannat politiit asserpaat tassami illuartippaat aporsisoortoq. Ingerlaqqipput, soorunami takullugu tupannarpoq, taanna oqarpoq.
Kalaallit Nunaanni Politiit apuisoqarnera ilisimallugu tallimanngornermi ullaap tungaani paasissutissiissutigaat. Taakkulu angut scooteriniittoq aamma ilisimallugu PET-ilu aamma suleqataasoq ilimatitsissutigaat.
Ilasaat naqittooraa
Politiit oqarnerat naapertorlugu el-scooterimik aquttup dronning assamminnialuni assani isaallugu dronning aportoorpaa. Taassumali ilasaat toortoorsimagaa, politiit oqarput. Ilagaat aquutip eqqaaniippoq.
Scooteri taamaalilluni ingerlavoq, tamannalu dronningimut annikitsumik apornermik kinguneqarluni.
Apornermi ajoqusertoqanngilaq, ajutoornerli pineqartoq uppernarsarneqartoq, Kalaallit Nunaanni Politiit nalunaarutigaat.
