Politikerit nuimasut Nuuk tikeraaraat: Taamaammat maaniipput

Danmarkimi, nunatsinni Savalimmiunilu naalakkersuisut siulittaasui sapaatip akunnerani uani naapinnissaannut siunertarineqartoq pingaarnerpaaq tassaavoq nunat taakku siuttuisa pingasut ukiumoortumik ataatsimiinnissaat.

Pisussanili annertuuni tamanna kisiartaanngilaq. Marlunngorpat Nunanut allanut, Sillimaniarnermut aamma Illersornissamut politikkikkut attaveqaatitut ataatsimiititaliami ataatsimiittoqartussaavoq, tassani danskit, kalaallit savalimmiormiullu naalakkersuisui arlallit aamma peqataassapput.

Aamma nunat taakkua pingasut inatsisartui siullerpaamik ataatsimeeqatigiissapput.

Tamanna pivoq Inatsisartut tungaanniit danskit Nunanut allanut tunngasunik politikkikkut aalajangiisartuisa ammanerusumik periuseqartoqarnissaanut ujartuisoqarsimanerata kingorna, Doris J. Jensen Siumumeersoq oqaluttuarpoq.

Inatsisartunut ilaasortat tassa Folketingimi Nunanut allanut tunngasunik politikkikkut aalajangiisartut, Inatsisartuni Nunanut Allanut Sillimaniarnermullu Ataatsimiititaliaq aamma kiisalu Lagtingimi Nunanut allanut tunngasunik aalajangiisartut ataatsimiinnermi peqataassapput.

Ataatsimiinnerit ataatsimiititaliallu assigiinngitsut amerlasuut paasiuminaassinnaapput, taamaammat sapaatip akunnerani uani ataatsimiinnerit pingasut ingerlanneqartussat pillugit KNR nassuiaasersuisimavoq.

Naalagaaffeqatigiit ataatsimiinnerat:

Naalakkersuisut siulittaasuisa pingasut ukiumoortumik ataatsimiittarnerat. Ataatsimiinneq nunat taakku pingasut akornanni nikerartumik ingerlanneqartarpoq. Tassa imatut paasillugu, ukiut pingasukkaarlugit nunarput qaaqqusisuusarpoq.

Ataatsimiinnerit pisortatigoortuunngitsumik oqalliffiupput, ataatsimiinnerni naalakkersuisut siulittaasuisa oqaluuserisassat assigiinngitsut oqaluuserisarpaat assersuutigalugu peqqinnissaqarfimmik ingerlatsinerup unammillernartortai, tassani nunarput Savalimmiullu Danmarkimik suleqateqarluarnerat apeqqutaasarmat.

Naalakkersuisut siulittaasui taakkua pingasut saniatigut ataatsimiinnermi allanik peqataasoqarneq ajorpoq, aamma ataatsimiinnermi eqqartugassat ataatsimiinnginnermi nassiunneqareertarnerat ileqquunngilaq.

Juunip 7-iani ataatsimiinneq ingerlanneqassaaq.

Attaveqaatitut ataatsimiititaliaq:

Ataatsimiititaliaq ukioq kingulleq Savalimmiuni ingerlanneqaqqaartoq. Naalakkersuisut nunatsinneersut, Savalimmiuneersut Danmarkimeersullu ataatsimiititaliami ilaasortaapput nunallu taakkua pingasut akornamminni paasissutissanik pingaarutilinnik avitseqatigiittoqartarnissaa pinerullugu ataatsimiititaliaq 2021-mi Københavnimi pilersinneqarpoq.

Assersuutigalugu nunanut allanut tunngasunut illersornissamullu politikkimik nunatsinnut Danmarkip aqutsineranut atatillugu suliassaqarfinni akuutitsinerunissaq ilaatigut siunertarineqarpoq. Peqataatinneqarnerunissaq pillugu nunatsinni Savalimmiunilu naalakkersuisut piumasaqareernerisa kingorna Nunanut allanut, Sillimaniarnermut aamma Illersornissamut politikkikkut attaveqaatitut ataatsimiititaliaq pilersinneqarpoq.

Juunip arferngani ataatsimiinneq ingerlanneqassaaq.

Inatsisartunut ilaasortat ataatsimiinnerat:

Danmarkimi, Savalimmiuni nunatsinnilu inatsisartut nunanut allanut ataatsimiititaliaasa ataatsimiinnissaat Naalagaaffeqatigiinnerup iluani suleqatigiittariaatsit ilagaat nutaajunerpaaq.

Siullerpaamik ataatsimeeqatigiissapput, aatsaallu ataatsimiinneq naammassereerpat ataatsimiinneq taanna ingerlanneqaqqikkumaarnersoq aalajangiiffigineqassaaq. Nunatsinni, Savalimmiuni Danmarkimilu inatsisartunut ilaasortat KNR-imut taama paasissutissiipput.

Sualummik nunatsinni nunanut allanut siunnersuisooqatigiinnut Issittumi nunanut allanut sillimaniarnermullu politikki pillugu tamakkiisumik ersersinneqartannginnerat ataatsimiinnissamut tunngavigineqarpoq.

Taamaammat ataatsimiinnissaq paasissutissiinertut ingerlanneqassaaq, ataatsimiinnermilu Savalimmiuni nunatsinnilu inatsisartunut ilaasortat nunanut allanut sillimaniarnermullu politikkip inissisimaffia annertunerusumik paasisaqarfigissavaat.

Ataatsimiinneq juunip 7-iani 8-nilu ingerlanneqassaaq.