Aviisi: Múte B. Egedep Løkke Rasmussen isornartorsiorpaa

Naalakkersuisut siulittaasuat danskillu Socialdemokratini naalakkersuisuutitarisimasaat akunnerminni pissusaat pitsaasuusimagaluartoq maanna allanngoriartortutut ippoq.

Naalakkersuisut siulittaasuat Múte B. Egede (IA) avisiimut Politikenimut taama oqarpoq.

Ukiuni kingullerni suliassat assigiinngitsut isornartorsiuinermut tunngaviupput, soorlu spiralilersuisimanermik qulaajaasoqarnissaanut Danmarkip kinguarsaanera, aammalu Folketingimi ilaasortaatitatta Aki-Mathilda Høegh-Damip kalaallisuinnaq qanittukkut oqalulluni saqqummiinerata isorineqarnera, aammalu Folketingip Issittumi naalagaaffiup aallartitaanik danskimik toqqaasoqarnera.

Múte B. Egedep pingaartumik nunanut allanut ministeri Lars Løkke Rasmussen matumani isornartorsiorneruaa, ilaatigummi oqaatigaa, taanna nunatsinnut ataqqinninngippallaartoq, matumani soorlu nunatsinni namminiilivikkiartornermut ingerlaarnerup sukkassusaanut tunngatillugu aammalu Issittumi naalagaaffiup aallartitaata nunatsinneersuusariaqarneranik tunuartitsinera.

- Naalakkersuisumma Danmarkimik suleqateqarneri eqikkaleruttorpakka. Taakku ilaat ajunngillat, ilaali ajorseriarput, Múte B. Egede Politikenimut oqarpoq.

Lars Løkke Rasmussenili Politikenimiit aamma aperineqarpoq, `Isornartorsiuineq ajuusaarnartuutippara, qilanaarpungalu juunimi Kalaallit Nunaaliarnissannut naalakkersuisut siulittaasuannillu naapinnissami tassani paatsuuinerit neriuppunga iluarsineqarumaartut, Lars Løkke Rasmussen oqarpoq.