Sverigemi ministeriunerup koranimik ikuallaasoqartarnera ernummatigai
Sverigemi akerliussutsimik takutitsinermi muslimit allagaatit illernartuutitaannik koranimik ikuallaasoqartarnerata allatigulluunniit innarliisoqartarnerata kingunerisinnaasai, Sverigep ministeriunerata Ulf Kristerssonip ernummatigai.
Kristersson tusagassiortunik Stockholmimi katersortitsinermi taama oqarpoq.
Koranimik ilaatigut ikuallaalluni akerliussutsimik takutitsisoqarnissaanut qinnuteqaatinik politiit arlalinnik tigusaqarsimasut, Kristerssonip taassuma saniatigut ilisimatitsissutigaa.
- Pilersaarutit piviusunngussappata taava ilungersunartumik arlaatigut ulluni tulliuttuni pisoqaratarsinnaanera ernummatigineqarsinnaavoq, taanna oqarpoq.
Assersuutigalugu peqqarniisaarniartoqarsinnaanera pinngitsoortinniarlugu Sverigemi oqartussat assigiinngitsut 15-it Sverigemi naalakkersuisunit upalungaarsimatinneqartut aamma oqaluttuaraa.
Muslimit allagaatit illernartuutitaat korani Københavnimi Sverigellu illoqarfiisa pingaarnersaanni Stockholmimi aallartitaqarfiit ilaasa saavanni sapaatit akunnerisa kingulliit ingerlaneranni ikuallanneqarsimapput.
Koraninik ikuallaasarnerit pissutaallutik Sverigemi isumannaallisaaniarnikkut pissutsit ilungersunarnerulersimasut, Sverigemi politiit isertortumik paasiniaasartut Säkerhetspolisenip sisamanngornermi oqaatigaa.
Sverigemi peqqarniisaarniartoqaratarsinnaaneranut naliliisarnermi isumannaallisaaniarneq qaffanneqarsimanngitsoq, isertortumik paasiniaasartut pisortaat Charlotte von Essen oqarpoq, Sverigelli saassunneqarsinnaanissaa peqqarniisaarnianit akuerisaasutut nalilerneqaannarani pingaartuutinneqalersutut isikkoqartoq oqaatigalugu.
