Svend Junge qujaniarfigalugu Nuummi ingerlaaqatigiinniarput

novembarip 23-at 2006 06:37

Ullumikkut ulloq – novembarimi sisamanngornerit sisamassaat – tassaavoq amerikamiut naatitsilluarsimanerminnut ulloq qujaniarfigisartagaat, Thanksgiving. Ileqqoq taanna, qujaniarneq, Kalaallit Nunaanni aamma atorneqarnialerpoq.

Nuummi innuttaasut qujaniarluni ingerlaaqatigiinnissamut unnugu qaaqqusaapput, qujaniarfiginiagaallu tassaavoq Svend Junge, kræfteqarluni maanna napparsimasoq.

- Inuk ataaseq Nuummi najugalippassuit qutsatissaqarfigaat, taannaavorlu Svend Junge, qujaniarnissamut aaqqissuisoq, Aviâja Rohmann Pedersen oqarpoq.

Svend Junge, 76-inik ukioqartoq, Danmarkimi Nørre Ommemeersuusoq, Kalaallit Nunannut 1959-imi tikippoq, sanasutut natilersuisartutullu taamanikkut sulisarpoq, Kalaallit Nunaannullu ukiuni kingullerni tunissuteqarnerpaalluni. Nuummi katersugaasiviutini kommunimut tunissutiginikuuvaa, aamma Dronning Ingridip napparsimmavissuanut scannerimik tunissuteqarluni.

Nuummi qujaniarnissami peqataasussat naneruanik naneruutinilluunniit nassaqquneqarput, ingerlaaqatigiinnerlu Nuup Katersortarfiata silataaniit nalunaaqutaq arfineq-marlunut aallartissaaq.